Galicia Ártabra Digital Noticias de Ferrol y la comarca de Ferrolterra.
37 rapaces de 1º da ESO do CPI San Sadurniño participaron esta semana na XVIII edición da campaña “Móllate polos Ríos”, promovida por ADEGA e apoiada por numerosas entidades e concellos de toda Galicia, entre eles o de San Sadurniño, co obxectivo de concienciar sobre a importancia do coidado dos cauces fluviais.
A actividade, prevista inicialmente para o domingo da semana pasada, retrasouse até o luns co obxectivo de facilitar a implicación do centro educativo. Na compaña do profesorado e persoal municipal, as mozas e mozos etiraron máis de 40 quilos de refugallos do tramo do Xubia comprendido entre o Mesón A Granxa e a ponte da AC-862.
A campaña “Móllate polos Ríos” fixo este ano as dezaoito edicións fomentando a implicación veciñal na conservación e recuperación dos cursos fluviais. O seu obxectivo principal é visibilizar a problemática da contaminación e fomentar actitudes responsables co medio natural. Para iso, ADEGA conta coa colaboración de colectivos sociais, centros escolares e administracións locais, que organizan o penúltimo domingo de setembro unha xornada de limpeza simultánea de ríos e regatos de toda Galicia.
En San Sadurniño, o Concello e ADEGA decidiron convidar ao alumnado de Bioloxía de 1º da ESO do CPI para que formase parte da experiencia, co fin de sensibilizar desde idades temperás sobre a importancia de coidar os ríos. Durante a mañá, o grupo percorreu as marxes do Xuvia recollendo plásticos, vidros e outros refugallos depositados ao longo do tempo. A actividade completouse cunha breve explicación sobre os impactos destes residuos na fauna e flora acuática.
O balance final do día foron máis de 40 quilos de refugallos retirados «e a satisfacción de contribuír á mellora dun espazo natural de grande valor ambiental», sinala a concelleira de Axenda 2030, Raquel Piñeiro López.
O Goberno local e ADEGA agradecen a implicación do alumnado e a colaboración do centro educativo, subliñando que iniciativas como esta serven «para crear conciencia ecolóxica entre a mocidade nun momento en que se multiplican, sobre todo a través das redes sociais, as mensaxes negacionistas sobre o cambio climático e sobre os efectos prexudiciais da acción humana sobre o planeta», aclara Piñeiro López. «Accións simbólicas coma esta fortalecen o compromiso coa sostenibilidade», conclúe a concelleira.
