Galicia Ártabra Digital Noticias de Ferrol y la comarca de Ferrolterra.
O espectáculo de narración oral forma parte da programación especial polo Día da muller.
A Biblioteca municipal de Neda sumarase este sábado á programación, impulsada polo Concello con motivo do Día da Muller. E farao cun espectáculo para o público infantil. Trátase do contacontos “Peques e heroas”, de Manuela Varela, centrado nos estereotipos de xénero e na igualdade, que se poderá desfrutar no espazo cultural, a partir das 12.30 horas.
A proposta chega a Neda da man de Manuela Varela e busca que os nenos e nenas da localidade reflexionen sobre os roles de xénero. Así, fala das “profas”, das “pilotas” e das “heroas”, e tamén dos pequenos e grandes actos heroicos que moitasmulleres deben facer para desempeñar as súas carreiras profesionais.
O espectáculo, incluído no ciclo municipal Lesme un conto?, continúa cunha versión da historia de Daniela Pirata, protagonizada por unha nena quere ser unha gran pirata e supera todas as probas que os piratas lle esixen. E remata coa historia dun pequeno heroe ao que lle gusta pintar as unllas de cores.
“Peques e heroas” conxuga diversión e educación en valores, e vai dirixido a rapazada de tres a nove anos. A actividade de narración oral forma parte da oferta de actividades do Mes da muller, impulsado co apoio do Pacto de Estado contra a violencia de xénero.
