O Mosteiro de Santa Catalina en Ares, conta con nova iluminación nocturna

A concellaría de Urbanismo de Ares informa do remate das obras que se estaban a acometer na contorna do Mosteiro de Santa Catalina, executando así o proxecto técnico de iluminación ornamental da fachada posterior e lateral esquerda do edificio.

Instaláronse 14 proxectores nas áreas axardinadas que circundan o Mosteiro, creando unha iluminación uniforme que reflicte tamén no plano horizontal pola reflexión da pedra. Este novo sistema de iluminación ornamental garante o embellecemento da contorna e permite apreciar os detalles artísticos e arquitectónicos do inmoble, un Ben de Interese Cultural (BIC) de gran valor patrimonial.

A actuación contou cun investimento total de 36.884,52 euros asumidos entre o Concello (6.884,52 euros) e a Axencia de Turismo de Galicia (30.000 euros).

 

39 NOVOS ELEMENTOS DE ILUMINACIÓN NOCTURNA EN TOTAL

A concelleira de Urbanismo, Olimpia Marcos, puxo en contexto o proxecto recentemente executado. “Dende o goberno local completamos toda a nova iluminación ornamental do Mosteiro de Santa Catalina. Centrámonos primeiro na fachada principal e lateral dereita para incorporar 17 proxectores e 8 luminariais lineais novas, e agora rematamos coa instalación destes 14 novos elementos sobre a fachada posterior e lateral esquerda”.

Para a edila de Urbanismo, “a finalización deste proxecto reafirma o noso compromiso pola dignificación do Mosteiro, un dos tesouros arquitectónicos da comarca de Ferrolterra: á posta en marcha da iluminación ornamental temos que sumar a recuperación do Cabido de Montefaro ou a rehabilitación da fachada e tamén da cociña, agora convertida en espazo para actividades sociais e culturais”.

Todo iso conforma a estratexia de dignificación do Mosteiro de Santa Catalina que se desenvolveu progresivamente ao longo das últimas lexislaturas.

Continuou Olimpia Marcos adiantando que esta non será a última das actuacións na contorna: “Xa estamos a preparar a pavimentación do Camiño da Bailadora, cun desgaste moi acusado, e tamén a incorporación de mobiliario urbano ao longo da vía. Sabemos que toda a península de Montefaro en xeral é un espazo con moito atractivo natural e patrimonial, e estas intervencións axudan a potencialo e poñelo en valor”, concluíu Marcos.

Lea también

La Concatedral de San Julián acogerá en Ferrol un nuevo ciclo coral internacional de música sacra

El alcalde de la ciudad, José Manuel Rey Varela, junto con el Coro Diapasón, organizador …