Galicia Ártabra Digital Noticias de Ferrol y la comarca de Ferrolterra.
O Campus Industrial de Ferrol e o Servizo de Estudantes da Universidade da Coruña organizan, este venres 5 de abril, a súa terceira Xornada de Portas Abertas entre as 9.30 e 19.30 dirixida a alumnado de Bacharelato e de ciclos de Formación Profesional Superior logo do éxito acadado tanto na súa primeira coma segunda edición, nas que participaron preto de 400 e 600 estudantes respectivamente.
Na quenda do citado venres 5, visitará o campus o alumnado do IES Sofía Casanova, do IES Concepción Arenal e do IES Canido de Ferrol así como o estudantado do IES de Mugardos.
Pola súa banda, a quenda de tarde estará dirixida a un público máis familiar e dará comezo ás 16:00 horas. O alumnado e público xeral inscrito nesta xornada poderá achegarse á oferta formativa da Universidade da Coruña no campus ferrolán a través de tres itinerarios: Ciencias da Saúde, Ciencias Sociais e Xurídicas + Artes e Humanidades ou Enxeñaría.
O estudantado que optase previamente polo itinerario de Ciencias da Saúde achegarase ata a Facultade de Enfermaría e Podoloxía, centro no que se imparten os graos en Enfermaría e Podoloxía. Pola contra, o alumnado que elixise o itinerario de Ciencias Sociais e Xurídicas + Artes e Humanidades visitará, en primeiro lugar, Facultade de Ciencias do Traballo, centro no que se imparte o grao en Relacións Laborais e Recursos Humanos. De seguido, trasladarase ata a Facultade de Humanidades e Documentación, onde se imparte o grao en Xestión Industrial da Moda e o grao en Xestión Dixital de Información e Documentación.
Desde o curso 2022/23, o centro acolle unha nova titulación, posta en marcha en colaboración coa Universidade de Vigo (UVigo), o grao en Relacións Internacionais. Ao igual que o grao en Xestión Industrial da Moda, esta titulación require dunha acreditación de nivel B1 de inglés que se fará efectiva no momento de formalizar a matrícula. No itinerario de Ciencias Sociais e Xurídicas + Artes e humanidades inclúese tamén a visita á Facultade de Ciencias do Traballo, centro no que se imparte o grao en Relacións Laborais e Recursos Humanos.
Pola súa banda, o itinerario de Enxeñaría levará ao estudantado ata a Escola Universitaria de Deseño Industrial (EUDI) onde se imparte o grao en Enxeñaría en Deseño Industrial e Desenvolvemento do Produto. Do mesmo xeito, o alumnado participante achegarase tamén ata a Escola Politécnica de Enxeñaría de Ferrol (EPEF) onde se imparten os graos en Enxeñaría Mecánica, en Enxeñaría en Tecnoloxías Industriais, en Enxeñaría Naval Oceánica, en Enxeñaría Electrónica Industrial e Automática e o Programa de Simultaneidade en Enxeñaría Mecánica e Enxeñaría naval e Oceánica.
A maiores, a escola oferta o grao en Enxeñaría Eléctrica, o primeiro grao dual do Sistema Universitario de Galicia (SUG), e o grao aberto en Enxeñaría Industrial, unha titulación que lle permite ao estudantado elixir a carreira que finalmente vai estudar no segundo curso optando así polo grao en Enxeñaría Mecánica, en Tecnoloxías Industriais, en Enxeñaría Eléctrica ou ben polo grao en Enxeñaría Electrónica Industrial e Automática.
