Preto de 6.500 escolares asistirán ás representacións da “39ª Mostra de Teatro Infantil e Xuvenil”

O Pazo da Cultura acolle dende o pasado luns a trixésimo novena edición da “Mostra de Teatro Infantil e Xuvenil” organizada polo Padroado da Cultura de Narón en colaboración coa Deputación da Coruña. A alcaldesa da cidade e presidenta do Padroado da Cultura, Marián Ferreiro, explicou que asistirán ás representacións programadas un total de 6.481 alumnas e alumnos de terceiro e cuarto da ESO, Bacharelato e Ciclos de centros de ensino de Narón e comarca.

Participan nesta edición da MOTIX os IES das Telleiras e Terra de Trasancos de Narón, o CPI do Feal, os CPR Santiago Apóstol, Jorge Juan e Ayala e a asociación Saúde Mental Ferrol, Eume e Ortegal. A maiores, da comarca tamén asistirá alumnado do centro Rodolfo Ucha e do IES Catabois, de Ferrol, do colexio da Xunqueira, de Fene e do centro As Mirandas, de Ares.

Un total de catro compañías representarán outras tantas obras nas vinte funcións programadas no Pazo da Cultura para esta edición, que rematarán o vindeiro 22 de novembro. Esta semana, o luns e onte, a compañía Talía Teatro representou a peza “A parábola do angazo” e a programación continuará xa no mes de novembro, os días 7, 8 e 9, coa compañía Mar-Mar-Teatro e a obra “Un pez en el corazón”. A estas representacións seguiranlle as dos espectáculos “Hugo”, da compañía Os náufragos teatro, os días 14 e 15 de e “Ándale!!! Buen apetito!!!” de Ghazafelhos, os días 20, 21 e 22 de novembro. Así mesmo, os días 7, 8 e 9 de novembro o Auditorio municipal acollerá o espectáculo “Un pez en el corazón”, a cargo da compañía vasca Mar-Mar e que se dirixe a público infantil.

“A maiores do labor que se desenvolve con esta mostra no que se refire á difusión e o acceso á cultura, en concreto ao teatro neste caso, tamén hai que destacar o respaldo que con este evento se ofrece a compañías teatraisgalegas, de onde proceden tres das catro participantes”, apuntou Ferreiro. A alcaldesa recalcou o papel da cidade “no ámbito da cultura, no que nos mantemos como un referente non só a nivel comarcal, onde continuaremos apostando firmemente pola formación e a difusión en diferentes áreas tal e como vimos facendo dende hai moitos anos”.