Pintura ferrolá, tempos de exposicións

Nas últimas datas presentáronse en Ferrol dúas exposicións de pintura de certo interese, adoecendo en ámbolos casos da xa habitual carencia dun axeitado catálogo. No Casino Ferrolano unha exposición de González Collado, co título xenérico de “Semblanzas de niñez”, mostra as últimas obras do pintor ferrolán, falecido fai un ano, centradas en diferentes recunchos da cidade e dentro da liña ultimamente seguida polo autor. 

A obra do pintor, un total de 18 acuarelas de amplo formato, exponse nunha sala do Casino Ferrolano, á que se lle puxo o nome de Gonzalez Collado; cumpre lembrar que xa o ano 1942 este pintor levo usa cabo a súa primeira exposición nesta entidade. A exposición acompáñase dunha serie de obras de cerámica da súa dona, Fina Pena, dentro da notable mestura de realidade e fantasía que caracteriza á artista ferrolá.

No Centro Cultural Municipal presentouse unha exposición, patrocinada pola Sociedad Artística Ferrolana. Baixo o título de “XXXVI Salón da Muller na Pintura 2019”, móstrase a obra de 36 artistas ferrolás ou afincadas na cidade. Trátase dunha serie de obras de diverso formato, de variada técnica empregada e mesmo de diferente interese e valoración

Ferrol é o berce de recoñecidos pintores, falándose incluso dunha escola propia de pintura, dispoñendo de numerosas coleccións de pintura en entidades oficiais e asociacións culturais, ademais de recoñecidas galerías pictóricas e coleccionistas de arte. Non embargantes, non se dispón dun Museo da Cidade, como teñen localidades de menor entidade, para expor o importante número de máis de mil obras pictóricas.

Ferrol posúe un Centro Cultural Municipal, un amplo edificio dezaoitesco, cuxas salas nobres, ben acondicionadas, deberíanse utilizar para expor de forma permanente as pinturas e gravados propiedade do Concello, varias delas almacenadas en diversos lugares do Centro.

Os derradeiros anos o pintor ferrolán González Collado cedeu ao Concello de Ferrol máis de duascentas obras. O Concello posúe ademais un amplo número de obras, de boa calidade e interese, de artistas locais ou afincados en Ferrol: Álvarez de Sotomayor, Agustín Robles, Eduardo de la Vega, Máximo Ramos, Vicente Díaz, Imeldo Corral, Bello Piñeiro, Segura Torrella e outros.

Estamos a falar de máis de dous centenares de obras, algunhas gardadas de calquera maneira ou simplemente colgadas nas escadas do Concello, cando este edificio tan só debería mostrar obras institucionais e retratos de persoeiros significados. Es vergoñento que despois de corenta anos de Concellos democráticos no se dispoña dun catálogo de los fondos artísticos municipais ou, caso de habelo, non se faga público, para dar a coñecer de forma exeitada estas obras.

Mentres tanto, unha institución privada ferrolá, o Hospital Xeral, dispón dunha notable pinacoteca, a mellor da cidade no seu xénero, unhas oitenta obras, na súa maioría retratos e obras de temática relixiosa, da que se editou un completo catálogo o ano 1995, por mor da súa exposición no Centro Cultural Municipal.

Entre as sociedades da cidade, o Casino Ferrolano ten catalogada unha notable colección de trescentos cadros de autores locais e foráneos, a maioría procedentes das exposicións alí realizadas. A Sociedad Artística Ferrolana, polo seu propio labor artístico e as exposicións que leva a cabo, ten unha importante pinacoteca dun centenar de obras. Outras dous entidades ferrolás, o Ateneo Ferrolán e o Real Coro Toxos e Froles, posúen tamén un número importante de obras.

Nesta relación circunstanciada cumpre incluír á Armada, dona dunha interesante colección pictórica de más de trescentas obras colgadas no Museo Naval e dependencias da Mariña, recollidas nunha publicación do ano 1984. Trátase dun inventario incompleto, ao non incluír un número importante de obras repartidas pola antiga Capitanía Xeneral, edificio de Intendencia, e varias dependencias de Caranza, A Graña e o Montón.

Todo isto xa está dito, pero como ninguén atende ou non lle importa, hai que repetilo
(André Gide, Premio Nobel do ano 1947)