Galicia Ártabra Digital Noticias de Ferrol y la comarca de Ferrolterra.
A Unidade de Medicina Preventiva da Xerencia Integrada de Ferrol cambia de emprazamento. Pasa do primeiro andar do Hospital Arquitecto Marcide do Complexo Hospitalario Universitario de Ferrol ó segundo andar do Centro de Especialidades deste mesmo hospital Arquitecto Marcide. Esta fin de semana realizábase o traslado, e, a partir de mañá martes 17, xa estará operativa no seu novo emprazamento, que implica máis espazo, xa que pasa de 38 metros cadrados a 52, máis comodidade, e incremento dunha consulta médica para unha segunda especialista en Medicina Preventiva que se incorporaba este ano. Investíronse ó redor de 21.500 euros na execución das obras necesarias para esta ampliación.
A poboación da área sanitaria ferrolá poderá acudir a esta consulta externa, que, entre outras moitas cousas, se ocupa da prevención de enfermidades; das vacinas tanto á poboación xeral como a pacientes con factores de risco; ou da consulta e atención a viaxeiros internacionais. Pero esta Unidade ten un carácter transversal e é fundamental para outros eidos dentro do ámbito hospitalario.
Accións de Medicina Preventiva
A especialidade de Medicina Preventiva e Saúde Pública implica “a práctica do fomento, elaboración, e aplicación de políticas de promoción e protección da saúde e da prevención da enfermidade, tanto para reducir a probabilidade da súa aparición, como para impedir ou controlar a súa progresión; así como a vixilancia da saúde da poboación e da identificación das súas necesidades”.
Isto tradúcese no ámbito da actividade diaria en actividades como a vixilancia e control da infección nosocomial -a que se produce no ámbito hospitalario- realizando estudos de incidencia, prevaleza e abrochos, ademais do control de infección por xermes con mecanismo de resistencia ou illamentos. Tamén participa en todo o relacionado coa hixiene e saneamento hospitalario, como a participación en comisión de compras e condicións de contratas de diversa índole relacionadas con isto, como a limpeza, por exemplo; a elaboración de normas de limpeza desinfección e esterilización; a participación na elaboración de plans de xestión de residuos; e controis de bioseguridade, entre outras.
Implicación en actividades para a poboación
Por outra banda, tamén está implicada en actividades sobre a comunidade, a poboación, coa participación no estudo de contactos de risco en determinadas patoloxías víricas, de transmisión sexual ou gastroenterites agudas; asesoría sanitaria en viaxes internacionais; colaboración en inmunizacións especiais en grupos de risco, como na campaña de vacinación que comezará este mesmo mes; e colaboración con autoridades sanitarias para o desenvolvemento de programas e intervencións colectivas en materia de saúde.
Ademais, funciona de apoio á xestión como órganos de asesoramento da dirección do Complexo Hospitalario Universitario, e realiza análise do entorno e de aqueles factores que poden influír ou modificar a actividade asistencial como indicadores socioeconómicos, de saúde (de mortalidade e morbilidade) e sanitarios. Participa en Comisións Clínicas; se ocupa tamén das enfermidades de declaración obrigatoria; e da elaboración de diversos protocolos.
Esta Unidade está formada por dúas facultativas. Este mesmo ano se incorporaba unha segunda profesional especialista en Medicina Preventiva. Ademais, conta con persoal de Enfermaría e auxiliar administrativo. Este servizo xestiona a súa propia axenda na consulta externa, tanto a de vacinas como a da atención a viaxeiros internacionais.
Engádese a isto que realiza interconsultas, tanto de atención primaria, como de pacientes hospitalizados, e das propias consultas externas que reclaman algún tipo de información ou atención. Realízase un seguimento diario de casos de alta en urxencias e dos pacientes illados; actúase diariamente tamén na base de datos de pacientes portadores de xermes resistentes; e estúdase a incidencia da infección de ferida cirúrxica limpa.
Xunto con isto, o xa citado estudo de investigación nosocomial, e da declaración de enfermidades denominadas de declaración obrigatoria, como a gripe. Colabora igualmente nos controis de bioseguridade ambiental de cabinas de farmacia e dos quirófanos, entre outras. Todo isto, para controlar o centro hospitalario e previr complicacións.
Só como exemplo de actividade, no que vai de ano realizáronse 269 interconsultas, e 1.271 vacinacións; ademais das actividades de control diarias mencionadas.
