Villamar(BNG) invitou a López Balado(PP) a votar en contra do convenio entre Augas de Galiza e o Concello de Ferrol

O BNG rexeita a taxa de saneamento e a entrega da xestión da EDAR a Emafesa

O portavoz municipal do Bloque Nacionalista Galego de Narón, Pablo Villamar, invitou ao seu homólogo do Partido Popular, Marcos López Balado, a votar en contra do convenio entre Augas de Galiza e o Concello de Ferrol para a formalización da encomenda de xestión da explotación, mantemento e conservación do sistema de saneamento e depuración da EDAR de Cabo Prioriño a Emafesa.

Villamar quere saír así ao paso das manifestacións do voceiro “popular” despois do último pleno nas que aseguraba que a veciñanza de Narón vai ter que afrontar unha “terceira suba” do recibo da auga. O concelleiro nacionalista lémbralle a López Balado que a súa formación aceptou os termos dos dous convenios anteriores e esgrimiu as declaracións do seu representante no pleno do 14 de xuño de 2012 nas que “minimizaba” as consecuencias económicas do texto dicindo literalmente o que segue: “Xa que di vostede –en referencia a Pablo Villamar- que os naroneses e naronesas imos ter que pagar tantísimos cartos, voulle lembrar que este ano 2012 o incremento do recibo de COSMA será de 0,66 euros ao mes, oito euros ao ano. Iso é o que vai supor o saneamento no recibo anual de cada naronés e para o ano próximo -2013- serán 16 euros”.

Por iso, o portavoz do BNG de Narón cre que a formación de López Balado está a enganar á veciñanza de Narón e, nesa liña, anímao a votar en contra do último convenio, como fixo o Bloque cos dous anteriores (2012 e 2015), unha proposta que fai extensiva ao resto dos grupos políticos con representación no pleno de Narón.

O BNG non variou desde o comezo

«A proposta do BNG non variou desde o comezo, a diferenza do que fixo o PP: que sexa Augas de Galiza a que xestione directamente a EDAR de Cabo Prioriño, como xa está a facer noutras trinta infraestruturas de todo o país ao abeiro do artigo 32 da Lei de Augas de Galiza, aprobada no ano 2010 e segundo consta no decreto posterior, de 2012, polo que se aproba o regulamento do canon da auga e do coeficiente de vertedura a sistemas públicos de depuración de augas residuais e que veñen substituír o antigo canon de saneamento.

Nestes intres, Narón non está a pagar polo uso da EDAR e a proposta do BNG é que se faga a través do coeficiente de vertedura e non dunha taxa municipal». Villamar lembrou «que as encomendas de xestión da Xunta ao Concello de Ferrol e de este a Emafesa remataron a súa vixencia en xuño de 2016 e que ata abril deste ano non se aprobou no pleno de Ferrol, se ben non foi até o 1 de agosto cando se asinou o acordo entre a Xunta e o Concello veciño» . “Entre esas dúas datas”, explicou Villamar, “algo que é competencia da Xunta, como é a ordenación do ciclo integral da auga de uso urbano e o establecemento das bases para unha xestión eficiente dos servizos de abastecemento, saneamento e depuración, estívoo a prestar dun xeito irregular Emafesa”.

O BNG lembra que desde o primeiro momento se opuxo á fórmula artellada polo Goberno do Estado e a Xunta de Galiza no convenio para a construción e explotación dos colectores e interceptores da marxe dereita da ría (2012) por ser terribelmente gravosos para a veciñanza de Narón.

A organización nacionalista considera igualmente “escandoloso” que naquel acordo se derivase cara aos Concellos o gasto das obras que non estiveran rematadas a 31 de decembro de 2015, “unha situación insólita e que supón un novo agravio comparativo para o Concello de Narón”. Tampouco avalou o sistema de encomendas establecido trala posta en marcha da depuradora, polas que o Estado lle entregou á Xunta a xestión da EDAR, esta fixo o propio co Concello de Ferrol e este con Emafesa.