José Manuel Blanco anuncia ante os participantes na festa «do Rio» o seu cesamento como alcalde de Narón o próximo día 23

O alcalde de Narón, José Manuel Blanco, anunciou ao mediodía deste domingo na Festa do Río de Terra Galega que o vindeiro 23 de setembro deixará o seu cargo no Concello con motivo da súa próxima xubilación.

O rexedor, que comezou a súa carreira política na cidade hai trinta e catro anos, deu as grazas a todos os veciños e veciñas de Narón que apoiaron ao equipo de TEGA “nos momentos difíciles e nos peores anos da crise”. No acto do partido, que reuniu este domingo na área recreativa de Pedroso a algo máis de setecentas persoas, Blanco “cedeu o timón” á primeira tenente de alcalde, Marián Ferreiro, “unha muller preparada e cun gran equipo que, xuntos, van conseguir que nun ano ninguén se acorde de min”. “Ese será o meu maior orgullo, porque significará que Narón segue medrando por riba do personalismo”, subliñou o alcalde.

O acto comezou cunha sesión vermú, trala que tomou a palabra o coordinador local de TEGA en Narón, Ibán Santalla, que tras agradecer a asistencia ao acto de militantes e simpatizantes do partido, explicou que, “xente nova como min e moitos compañeiros e compañeiras imos dar un paso adiante para coller as rendas do partido en Narón, e confiamos unha vez máis no voso apoio”. Sobre o relevo de Blanco por parte de Marián Ferreiro, Santalla dirixiuse aos presentes recordando “unha frase que me dixo unha persoa maior non hai moito tempo: Neniño, non hai casa que sexa gobernada por unha muller que vaia mal”.

A continuación falou o coordinador xeral de Terra Galega, Guillermo Sánchez Fojo, que recordou que coñeceu a Blanco cando os dous eran uns nenos. “Por casualidades da vida tocounos traballar xuntos cando eu tiña 23 anos e el algún máis, e desde aí estivemos xuntos na vida sindical, na política, nas asociación de veciños… foi meu compañeiro, meu amigo….” , dixo un emocionado Sánchez Fojo antes de ter que facer unha pausa para continuar co seu discurso. Tralos aplausos dos asistentes, o secretario xeral continuou dando as grazas a Blanco “por ser o alcalde e a persoa que fuche, por facer un equipo e polo moito traballo feito por Narón”.

Subiu a continuación o alcalde que, en ton de broma, recriminou a Sánchez Fojo que se dirixise a el en pasado en todo momento, “porque di que fun, fun, fun… e vou seguir sendo”. O rexedor local asegurou que “marcho coa cabeza alta, cada un ten que vivir coas circunstancias do seu tempo e os nosos foron duros, pero soubemos afrontalos”. Blanco deu as grazas aos asistentes á Festa do Río “polo voso apoio nos momentos máis difíciles e por formar parte da historia e do crecemento de Narón, que sen vós non existiría”. Rematou desexando moita sorte a Marián Ferreiro, “unha muller de confianza, preparada, traballando sempre para que todo saíra non ben, senón perfecto” , e ao equipo de TEGA, para ao finalizar pedir aos asistentes o seu apoio ás políticas de TEGA en Narón.

O propio Blanco deu paso “á futura alcaldesa de Narón, Marián Ferreiro”, que iniciou a súa intervención asegurando ter “sentimentos un tanto encontrados”. “Por un lado sinto ilusión por afrontar esa nova etapa e por outro unha certa nostalxia, xa que Blanco remata a súa traxectoria como alcalde”. Sobre esta última, Ferreiro destacou que “foi exemplar e contribuíu a que TEGA siga sendo vista polos naroneses e naronesas como a mellor opción de goberno”. Agradeceulle “o seu liderazgo e o feito de manter unido ao equipo do Concello, as súas ensinanzas e paciencias e”, dixo emocionada, “moi no persoal, grazas por crer en min e impulsarme para que chegara ata aquí”. Finalmente, Ferreiro subliñou que “para nós sempre serás un líder” e recoñeceu que a súa chegada á alcaldía será “un gran reto que desexo responder como se merece, con todo o maior esforzo, para o que conto co equipo de Terra Galega”. A portavoz de TEGA en Narón rematou pedindo aos asistentes “a vosa confianza para poder gañar a alcaldía no ano 2019 e continuar traballando polo benenestar da nosa xente”.

Tralo turno de intervencións proxectouse un video no que se repasaba a carreira política de José Manuel Blanco en Narón, desde a súa entrada na corporación local, no ano 1983. A continuación os asistentes gozaron dun xantar de confraternidade baixo unha carpa instalada en Pedroso para a ocasión.