Galicia Ártabra Digital Noticias de Ferrol y la comarca de Ferrolterra.
Alumnos e alumnas da materia de Anatomía do primeiro curso do Grao de Enfermaría da Facultade de Enfermaría e Podoloxía de Ferrol e os nenos da aula hospitalaria do Complexo Hospitalario Universitario de Ferrol aprenden xuntos os sistemas básicos do corpo humano a través do programa Aprendemos saúde cos alumnos de Enfermaría, seguindo a liña de colaboración entre o Campus de Ferrol e o Servizo Galego de Saúde. É a terceira edición deste proxecto que comezaba hoxe, e se prolongará ata o mes de maio. Estes alumnos, un total de 49, dividiranse en seis grupos, e o primeiro deles abordou hoxe o sistema nervioso.
Co asesoramento do profesional de enfermaría e mestre de Anatomía da Facultade, Avelino Castro; e coa mestra da aula hospitalaria, Pilar Porta, estes alumnos de Enfermaría organizan diferentes actividades didácticas para achegar ós nenos e nenas hospitalizados información sobre algúns dos sistemas básicos do corpo humano como o circulatorio, respiratorio, dixestivo, endocrino, nervioso e xenito-urinario. As actividades son creadas especialmente para a aula, e nesta ocasión xogaron coa percepción das cores, cun especial Pasapalabra, e crearon unha neurona xigante. Noutras edicións foron, entre outras, puzzles, xogos de preguntas e repostas, alumnos anuncio, ou reprodución dos sistemas con materia de reciclaxe.
O alumnado ten unhas xuntanzas previas, nas que se intercambia información sobre as peculiaridades da aprendizaxe dos nenos e nenas hospitalizados, e os coñecementos que estes tiñan en xeral sobre anatomía básica. A mestra da Aula hospitalaria destaca a capacidade e o enxeño dos alumnos, xa que é moi difícil elaborar material para nenos con idades tan diferentes como as que te podes encontrar cada día na aula. Como novidade este ano, á dificultade propia da actividade, engádese o feito de que teñen que desenvolver os xogos que collan nunha única carpeta para facilitar o seu manexo ó longo do ano por tódolos nenos que pasen pola aula.
Xa na sesión na propia aula, e cos nenos e nenas hospitalizados, os alumnos e alumnas da Facultade preséntanse cando chegan; coñecen as particularidades de cada un dos nenos cos que van falar; e dan unhas pinceladas cunha presentación do sistema que van tratar nesa sesión. E, trala exposición, comezan así as actividades lúdicas, diferenciadas, e traballadas previamente, para que os nenos xoguen e aprendan. O primeiro día dedicouse ó sistema nervioso, diferenciando as distintas partes, sabendo onde se sitúan, e que fan, a través dun Pasapalabra especial para a ocasión.
O traballo non remata aí, xa que a mestra da aula hospitalaria intercambia posteriormente impresións cos nenos e nenas hospitalizadas, que fan, entre outros, traballos de redacción sobre esta experiencia. Tanto a mestra da aula como o profesor da facultade destacan que “é unha actividade moi positiva tanto para os nenos ingresados, porque é unha actividade nova que se sae da rutina, como para os alumnos de Enfermaría, porque é a súa primeira interacción co que vai ser o seu mundo laboral”, indica Pilar Porta, a mestra da aula hospitalaria.
Colaboración, aprendizaxe e saúde
Esta actividade supón a colaboración entre dous ámbitos docentes, que implican niveis educativos diferenciados, pero que presentan como eixe común dous conceptos fundamentais: saúde e ensinanza. Os obxectivos para o alumnado a da aula hospitalaria é achegarse a conceptos básicos de Anatomía, localizar os órganos fundamentais no corpo humano, e ser quen de comprender as funcións básicas do mesmo.
Por outra banda, os alumnos da Facultade “coñecen e identifican a estrutura e función do corpo humano; aprenden a aprender, a comunicarse de maneira efectiva nun entorno de traballo, e adquiren capacidade de análise e síntese. Xunto con isto, tamén adquiren a capacidade de se comunicar con persoas non expertas, e de se expresar correctamente, tanto de forma oral coma escrita”, aspectos correspondentes ás competencias da súa titulación.
Os alumnos e alumnas da Facultade, trala actividade, teñen que avaliar a súa experiencia cunha memoria que recolla unha reflexión final. Todos eles coinciden no carácter “enriquecedor” do que, para a maior parte deles, é o primeiro contacto co hospital.
