Narón inicia o programa «bica e arrinca» con espazos de zona segura nos colexios

A Concellería de Seguridade Cidadá, dirixida polo edil Guillermo Sánchez Fojo, iniciará este mes o programa “Bica e arrinca”, que consiste na habilitación de espazos nas entradas aos colexios para que os pais e nais dispoñan dunha zona segura para deixar aos seus fillos e fillas á hora de entrar ao centro, realizando unha parada e despedíndose deles ás portas dos colexios para a continuación retomar a marcha.

O edil naronés saíu ao paso das acusacións realizadas polos populares, incidindo en que se mantiveron varias xuntanzas con persoal das Anpas dos centros nos que se aplicará este programa: Xuvia, Jorge Juan, Piñeiros, A Solaina e O Feal e tamén con outros representantes da comunidade educativa. Sánchez Fojo valorou a iniciativa, destacando que será “voluntaria” para as familias e avanzou que se porá en marcha nos vindeiros días.

“O programa “Bica e arrinca” en ningún momento pretende eliminar zonas de estacionamento xunto aos centros escolares, senón que aposta por habilitar lugares seguros, neste caso acotando con sinalización horizontal, e nun tempo limitado, espazos de catorce metros ás portas dos recintos educativos, para que os nenos e nenas poidan baixar do vehículo nas condicións de seguridade óptimas”, subliñou o concelleiro naronés.

A falta de realizar o pintado desa sinalización horizontal, tarefas que previsiblemente comezarán este martes, xa se instalaron os indicativos verticais deste servizo. Estará operativo de luns a venres nos cinco colexios implicados inicialmente, de 8.30 a 9.10 horas e, no colexio do Feal, con clases tamén en horario de tarde, funcionará ademáis entre as 16.00 e as 16.40 horas, tal e como indicou Sánchez Fojo.

O equipo de Seguridade Vial do Concello traballa nesta proposta, xunto con outras que se porán tamén en marcha na localidade, como os “Camiños seguros” ou os “Aparcamentos disuasorios”. A proposta de “Bica e arrinca” aposta por acollerse ás medidas propostas desde a Fundación Mapfre sobre a seguridade nos entornos escolares do concello. “Trátase de consolidar de xeito global, a través destas propostas, unha cultura de mobilidade segura na comunidade escolar”, destacou o concelleiro naronés.

O programa de Educación Vial do Concello consolidou nos últimos dez anos unha proposta educativa relacionada coa cultura da mobilidade, “buscando en todo momento o consenso de toda a comunidade educativa, o que inclúe ás Anpas, aos docentes e aos escolares”, apuntou Sánchez Fojo.

O edil de Seguridade Cidadá asegurou que “estes proxectos están perfectamente definidos e tanto desde as Anpas e colexios implicados como desde a oficina de Educación Vial situada no Concello, está a disposición dos interesados a información relativa a cada un deles, que pode consultar calquera persoa, ou mesmo aclarar as posibles dúbidas que teña ao respecto”.

O concelleiro agradeceu de novo a colaboración prestada tanto desde desde as Anpas como desde os centros e as familias en todas cantas propostas se impulsan desde o Concello co fin de incrementar a seguridade viaria no termo municipal naronés. Así mesmo, indicou que días antes da posta en marcha do programa “Bica e arrinca” se informará de novo ás Anpas e aos veciños da zona da súa posta en marcha.