Recuperando a memoria do barrio de Recimil

A área de Benestar Social, que dirixe Beatriz Sestayo, continua a traballar intensamente pola recuperación social e cultural do barrio de Recimil, no marco do Plan socio comunitario co que se están a impulsar numerosas actividades encamiñadas a mellorar a convivencia.

Neste contexto o CEIP de Recimil acolleu unha xornada na que os alumnos dos dous cursos de terceiro de Primaria tiveron a oportunidade de falar cos veciños que participaron nos Encontros da Memoria, nos que se puxo en valor a historia do barrio.

Tratouse dun acto interxeracional no que os maiores lles trasladaron ós pequenos a enorme historia que agochan as vivendas de Recimil e do seu propio grupo escolar. O proxecto orixinal do barrio data xa do ano 1929 e débese ao arquitecto Santiago Rey Pedreira, que ideou un barrio de trazado e igual número de vivendas, que se construirían para rematar con varios anos de necesidades da mesma en tempos en continuo crecemento. A este proxecto se lle engadiu a creación de locais comerciais, un mercado e o grupo escolar.

Pero ademais os nenos puideron coñecer algúns dos xogos e xoguetes tradicionais, que elaboraron os propios integrantes dos Encontros da Memoria, como a billarda, unha hélice feita con arame, barcos de cáscara de noz e papel, dardos de de cartón e madeira de saúco ou o pita carneiro.

Xoguetes elaborados polos maiores rememorando a súa infancia que agora foron doados ó colexio de Recimil para que poidan ser expostos e sirvan para manter esta parte importante do coñecemento colectivo e oral do barrio.