Celebrouse o I Foro Cívico que aposta pola participación Concello-veciñanza

O I Foro Cívico do Concello de Ferrol ‘Reiniciamos’ deu este xoves a tarde o primeiro paso adiante cara un Ferrol de construción colectiva que aposta por tecer redes de participación directa e entre o Goberno local e a veciñanza, abrindo novas canles de comunicación na toma de decisións para implicalos na na diagnose e resolución dos problemas, coa exposición das ideas, inquedanzas, vivencias e experiencias previas.

Este I Foro Cívico congregou a mais dun cento de veciños no Teatro Jofre nun acto que arrancaba pasadas as seis da tarde coa intervención do alcalde, Jorge Suárez, e do Concelleiro de Participación e Normalización Lingüística, Álvaro Montes Celeiro.

Sumáronse preto de 150 veciños, a título individual, ou como representantes de moitas das entidades culturais, empresariais e veciñais dos barrios e parroquias do Concello. Entre os asistentes tamén se contaban outros concelleiros da corporación local como Esther Leira e Rosa Méndez, de Vivenda e Rehabilitación e Medio Rural e Patrimonio Histórico, así como José Tomé e José Pedrouzo.

“Agrádame ver hoxe por aquí a moita xente do tecido veciñal e do mundo da cultura que veñen a apostar pola participación, pola construción da cidade que se atopa nunha situación complexa e con recursos moi limitados para tratar de darlle a volta entre todos”, manifestou o alcalde na apertura do I Foro.

Pola súa banda, o concelleiro de Participación, Álvaro Montes, avogou por envorcar as ideas, desexos e achegas colectivas no Foro como os vimbios sobre os que facer cidade de todos.

A celebración deste I Foro Cívico é o primeiro paso para artellar as ferramentas precisas para recuperar a democracia directa e participativa no Concello de Ferrol, de xeito que se se conecte a Administración local cos seus veciños, problemáticas, e necesidades. Isto pasa, necesariamente, por darlle voz a veciñanza para que recupere o protagonismo na toma de decisións. Precede a constitución, no 2016, dos Consellos Sectoriais (Sociosanitario, Lingua, Deportes, Cultura..), e as Asembleas de barrio que terá o seu reflexo nos vindeiros orzamentos municipais.