Galicia Ártabra Digital Noticias de Ferrol y la comarca de Ferrolterra.
O Grupo Municipal Socialista, a través da concelleira María López, critica o recorte nun 70% da partida destinada á Oficina de Rehabilitación de Ferrol, respecto a unha partida do 2011, xa recortada. Lembran que no 2011 a partida destinada para a oficina de Ferrol foi de 80.000 euros, e agora é de 25.000 euros.
Así, os e as socialistas definiron as actuacións constantes da administración autonómica en recortes sobre recortes, mentres o alcalde mira para outro lado, denuncian os socialistas. A este respecto, María López insta ao alcalde a que non sexa sumiso antes as medidas tan negativas para a cidade que está a tomar a administración galega.
Neste senso, o Grupo Socialista pídelle ao alcalde de Ferrol que esixa á Xunta de Galicia unha rectificación, habilitando os fondos necesarios para procurar a atención necesaria e un correcto funcionamento da oficina, dando resposta á demanda existente e non sexa cómplice das decisións que está a tomar a Xunta, que están á perxudicar á cidade.
Para os socialistas, o obxectivo para a Xunta e Concello debería ser potenciar a oficina, dotándoa de máis recursos e medios e, por tanto, posibilitando un maior número de actuacións, destacando a súa importancia, xa que permitiu xestionar a rehabilitación das vivendas e edificios en San Felipe, A Graña, A Madalena e Ferrol Vello, así coma as reformas mediante o programa Renove en tódolos barrios da cidade. Polo tanto, necesita un impulso maior, non un retroceso.
A concelleira socialista, María López, manifesta que non pode haber excusas para ralentizar as rehabilitacións dos conxuntos históricos, xa que debemos protexer o noso patrimonio arquitectónico. Lonxe de recortar, o que debe facer a administración pública é fomentar se convertan en polos de atracción da poboación, do turismo, e do comercio local das devanditas zonas, evitando que queden baleiras, e mellorando a calidade de vida dos ferroláns e ferrolás que viven no casco histórico da cidade. E neste senso, a Oficina de Rehabilitación actúa como órgano xestor das tramitacións e das axudas ás rehabilitacións.
Que a Xunta non se escude nunha suposta limitación de funcións
Así mesmo, os e as socialistas piden que a administración autonómica non se escude nunha suposta limitación de funcións para rebaixar nesa cuantía a partida destinada ás devanditas oficinas, xa que seguirán prestando o servizo de asesoramento e información ás persoas interesadas sobre as actuacións nos ARIS (áreas de rehabilitación integrais), a tramitación dos expedientes e seguimento técnico das obras dos ARIS, así como tamén outras relacionadas coa vivenda.
Lembran ademais a demora por parte da Xunta do decreto que desenvolve o plan de vivenda 2013-2016. Un retraso que ten paralizado o plan de vivenda, que afecta directamente a Ferrol, polo que entenden que urxe o desenvolvemento do decreto que adapta o plan vivenda, para que Ferrol poida facer fronte a seguinte fase de rehabilitación. Estase a producir así un impas, debido ao retraso na súa posta en funcionamento, que provoca a parálise do programa Renove, entre outros programas. Sendo este un programa de rehabilitación que ten por obxecto melloras na accesibilidade, actuacións para garantir a seguridade e a mellora da eficiencia enerxética, e axudas para a rehabilitación de edificios e de vivendas.
Os e as socialistas pídenlle ao alcalde que non deixe perder os fondos para a rehabilitación, como sucedeu cando sendo o concelleiro de facenda Rey Varela a cidade perdeu 6 millóns de euros do Plan Cuíña, destinados á rehabilitación para o barrio de A Madalena, provocou unha parálise considerable na rehabilitación do noso casco histórico, na que se incluía o edificio do Ateneo Ferrolán, que tivo que ser rehabilitado polo goberno socialista no anterior mandato.
Así, María López conclúe que os feitos veñen unha vez máis a contradicir as palabras, xa que pasados 6 anos dende que Feijoo asinou o contrato coa cidade de Ferrol, prometendo o impulso da rehabilitación dos barrios de Ferrol Vello e A Madalena, o recorte dos recursos da oficina de rehabilitación de Ferrol vai xusto na dirección contraria.
