Galicia Ártabra Digital Noticias de Ferrol y la comarca de Ferrolterra.
A XLI Mostra de Teatro Infantil e Xuvenil de Narón (MOTIX) completou esta semana a representación da obra ‘Travesía Unicornio’, da compañía Teatro dos Ghazafelhos. Presentada en seis funcións os días 25, 26 e 27 de novembro no Auditorio Municipal da Praza de Galicia, tivo como espectadores a 1.357 escolares de 4º, 5º e 6º de Educación Infantil de centros educativos de Narón e comarca.
A iniciativa, organizada polo Padroado da Cultura do Concello de Narón en colaboración coa Deputación da Coruña e a Rede Galega de Teatros e Auditorios, ten como obxectivo principal actuar como axente socializador, permitindo o acceso de novos públicos ao teatro e ofrecendo actividades didácticas arredor das artes escénicas.
Tras estas representacións, a MOTIX continúa o seu percorrido nas Escolas Infantís Municipais da Solaina, A Gándara e Piñeiros, onde a compañía Teatro ao cubo presentará a obra ‘Voo’ os días 1, 2 e 3 de decembro, completando así a programación da edición deste ano.
Con esta actividade, a mostra sumará 6.400 escolares de Narón e comarca como asistentes a algunha das obras desta edición, consolidándose como unha das iniciativas culturais de referencia na promoción do teatro infantil e xuvenil en Galicia.
