Galicia Ártabra Digital Noticias de Ferrol y la comarca de Ferrolterra.
O evento gastronómico terá carácter internacional, posto que entre as máis de 20 queixerías participantes hai numerosas do territorio nacional e tamén de Portugal. O alcalde de Pontedeume destacou “o gran labor que se está a realizar dende o Concello para poñer en valor os produtos quilómetro cero” .
Máis de 20 queixerías nacionais e de Portugal participarán en Merca Queixo, a I Feira do Queixo do Concello de Pontedeume que terá lugar os días 26 e 27 de abril na Alameda de Raxoi.
O alcalde de Pontedeume, Bernardo Fernández Piñeiro, a concelleira de Cultura, Ángela Piñeiro, e o presidente da Cooperativa de Campo Capela, Domingo Souto, presentaron no Galicia Fórum Gastronómico este evento pioneiro en Pontedeume.
Con esta nova feira, o Concello de Pontedeume busca poñer en valor a gran tradición de produtos alimentarios artesanais existente en Galicia e, en particular, do queixo e a súa vincución á vila eumesa. “Dende o Concello de Pontedeume estamos a apostar pola posta en valor dos produtos de proximidade e quilómetro cero, que representan a calidade e excelencia dos produtos galegos”, explicou o alcalde de Pontedeume na presentación.
“Queremos amosar a tradición queixeira da nosa vila e lembrar a estampa histórica da nosa rúa real ateigada de mulleres que vendían queixos nos soportais”, engadiu.
Showcookings, obradoiros para público familiar, degustacións, eventos musicais, coloquios, e moito máis. O programa da I Feira de Queixos de Pontedeume inclúe unha ampla variedade de actividades para todos os públicos.
O obxectivo do Concello de Pontedeume é divulgar e dar a coñecer a cultura do queixo, fomentar a relación entre os distintos produtores, abrir un concepto de mercado onde o cliente teña interese por coñecer a orixe do produto e potenciar o turismo gastronómico.
A concelleira de Turismo e Promoción Económica, Ángela Piñeiro Carrera, destacou “que esta celebración manifesta o compromiso do Goberno municipal co comercio e cos pequenos produtores, que son un motor esencial da economía galega e local”.
Pola súa banda, o presidente da Cooperativa de Campo Capela, Domingo Souto, agradeceu a iniciativa ao Concello de Pontedeume e sinalou que traballarán “para que Merca Queixo sexa un referente ao longo do tempo”.
O evento organizado polo Concello de Pontedeume en colaboración coa Deputación da Coruña tamén contará co patrocinio de Celta, Unión de Comerciantes e Autónomos Eumeses (UCOA), e da Cooperativa de Produtores Campo de Capela.
