Rivas, presenta a VI Ciberliga Nacional de retos no ciberespazo

A subdelegada do Goberno na  Coruña, María Rivas, participou esta semana na presentación da VI Ciberliga Nacional de retos no ciberespazo que organiza a Garda Civil. 

A presentación tivo lugar no IES Alfredo Brañas de Carballo, e contou  coa participación do alumnado de 4º da ESO que son aos que se dirixe  modalidade pre-amateur creada na anterior convocatoria.

Son un total de 51 os centros educativos de Galicia que poden  inscribir aos seus equipos, antes do 22 de novembro, a través da web ­ www.ligagc.com . Os equipos estarán compostos preferiblemente por 4, que disputarán a fase clasificatoria en Galicia entre o 25  o 29 de novembro nos propios centros educativos. Os institutos  clasificados disputarán a final no Centro Universitario da Garda Civil de Aranjuez no mes de marzo de 2025.

A subdelegada indicou que con esta competición, a Garda Civil pretende  concienciar á xuventude sobre o uso seguro e responsable das novas  tecnoloxías, así como potenciar o coñecemento e premiar o talento no  ámbito  da ciberseguridade. O alumnado participante terá que  enfrontarse, e tratar de resolver, unha serie de ciber-retos que  simulan situacións reais que poden atoparse cando navegan por  internet. E para resolvelos deberán empregar todas as súas  habilidades, traballando en equipo e poñendo en práctica as ensinanzas  recibidas, especialmente na acción formativa que se desenvolve de  maneira previa á competición.

Durante a súa intervención, María Rivas sinalou que “a ciberseguridade  constrúese e debe mellorarse día a día”, sente este o único xeito de  enfrontar as novas ameazas que van xurdindo. “Os hackers cada vez  actúan cun maior nivel de sofisticación, e necesitamos protexer a  información e os sistemas. Isto lévanos á necesidade de implementar  medidas de seguridade cada día máis robustas e para conseguilo é  fundamental a formación e a incorporación de talento”.

A subdelegada recordou que “a ciberdelincuencia non é algo que lle  pasa aos demais. Todas e todos estamos en risco. Por tal motivo é  fundamental formarse xa que canto máis preparados e preparadas  estamos,  mellor podemos autoprotexernos ao tempo que contribuímos a  crear unha internet máis segura”.

Finalmente convidou a todos os centros educativos e ao alumnado de 4º  da ESO a participar na “National Cyber League” da Garda Civil para  contribuír dende a mocidade a crear entre todas e todos esa internet  máis segura, aproveitando a competición para aprender máis sobre  ciberseguridade, superar retos, e tamén divertirse e competir en equipo.

A quinta edición (ano 2023) implementou a modalidade pre-ameteur, para  alumnos de 4º curso da ESO, cun proxecto piloto nas Comunidade  Autónomas de Galicia, Castela a Mancha e Madrid. A participación  chegou a máis de 4.000  alumnas e alumnos de 4º da ESO das 4  Comunidade participantes nesa primeira convocatoria.

Na sexta edición (2024) ademais de continuar coas modalidades amateur  e para profesionais das forzas de seguridade, afiánzase a pre-amateur,  aumentando a nove as Comunidades Autónomas nas que os alumnos de 4º da  ESO demostrarán as súas habilidades e coñecementos. Ademais das Comunidades Autónomas do ano 2023, este ano únense Cantabria, Castela  e León, Estremadura, Illas Baleares, Illas Canarias e Navarra.

No acto de presentación da Ciberliga, a subdelegada estivo acompañada  polo Xeneral Xefe de Zona de Galicia da Garda Civil, Miguel González  Arias; o alcalde de Carballo, Evencio Ferrero; a Directora Xeral de  Ordenación e Innovación Educativa, Judith Fernández e a Directora do  IES Alfredo Brañas, Mónica Mariño.