Ultímase en Narón un completo programa de Samaín

A alcaldesa da cidade e presidenta do Padroado da Cultura, Marián Ferreiro, presentou este venres 25 xunto con Miguel Ángel Santalla e José Manuel López, da Agrupación Veciñal San Mateo de Trasancos, a programación coa que o vindeiro 31 de outubro se celebrará o Samaín.

Os actos desenvolveranse no Centro cívico social de San Mateo, na escola da parroquia e nas súas inmediacións durante a tarde e parte da noite. Na tarde do xoves da vindeira semana comezarán a desenvolverse as diferentes propostas, a partir das 17.00 horas.

Poderase ver unha exposición de cabazas realizadas con alumnado de terceiro e cuarto de Primaria de centros escolares da cidade a través dun obradoiro impulsado dende o Padroado da Cultura e tamén a esa hora comezarán uns obradoiros de cabazas e maquillaxe nos que poderán participar as persoas que o desexen.

Ás 19.00 horas dará comezo unha actuación musical a cargo de Gramola Gominola e ás 20.00 horas, como é tradicional nesta data, sairá das inmediacións do local social a tradicional “Comitiva de Luces e Tebras”, un percorrido “terrorífico” de aproximadamente quilómetro e medio polas inmediacións do Centro Cívico Social de San Mateo e no que os caminantes portarán candeas para alumear na escuridade.

A programación inclúe ás 20.30 horas o Obradoiro do Medo, unha proposta para menores ata 12 anos que terá lugar na Escola de San Mateo.

A amenización nocturna do Samaín correrá a cargo do Grupo de Gaitas do Padroado da Cultura, cuxa actuación comezará ás 21.00 horas.

Un ano máis, non faltarán nesta cita o afamado caldo e os liscos que prepararán representantes da Agrupación Veciñal de San Mateo e que se servirán ás persoas que desexen degustalos a un prezo simbólico de dous euros.

Os tickets poderán adquirirse na zona da carpa, tal e como indicaron os representantes da entidade veciñal.

A alcaldesa e os representantes da AVV San Mateo animaron á cidadanía a achegarse á parroquia para desfrutar da celebración do Samaín, “mantendo viva unha cita de orixe celta coa que se celebra o comezo do inverno e o inicio do Ano novo celta”.

Ferreiro destacou a implicación da veciñanza de San Mateo nesta convocatoria “que ano tras anos reúne a centos de persoas ao longo do día, de todas as idades e chegadas de Narón e tamén doutros concellos da zona”.

Lea también

Club Arco Narón inicia las clases al aire libre

Como viene siendo habitual, el mes de abril indica el comienzo de las clases de …