Galicia Ártabra Digital Noticias de Ferrol y la comarca de Ferrolterra.
O Cineclube Serie B de Narón vén de presentar unha nova edición dos Mércores de Cine, que dará comezo este próximo 12 de novembro no Pazo da Cultura de Narón. O presidente desta asociación cultural, Alberto Pena, deu a coñecer a programación acompañado pola alcaldesa Marián Ferreiro, nun acto celebrado no Concello.
Nesta ocasión, o ciclo ten como fío condutor as relacións familiares, un tema que o Cineclube explorará a través de catro longametraxes multipremiadas, asinadas por destacados nomes do cinema contemporáneo. “Tras o éxito de ‘Coco’, que contou cunha grande afluencia de público este Samaín, queriamos continuar cun ciclo que apelase tamén ás emocións e á identidade, pero dende outro lugar”, explicou na presentación Alberto Pena.
“Nesta ocasión escollemos películas centradas nas relacións familiares, nas diferentes formas de paternidade e de vínculos entre pais e fillos, irmáns ou curmáns. Hai filmes con adolescentes, nenos e familias que se reconstrúen tras a perda ou a distancia. Son historias que, dalgunha maneira, todos podemos sentir próximas”, engadiu.
A programación abre este 12 de novembro con ‘Los Tenenbaums’, de Wes Anderson, unha comedia excéntrica sobre unha familia de nenos prodixio que se reencontra anos despois baixo o mesmo teito. O 19 de novembro será a quenda de ‘Lady Bird’, ópera prima de Greta Gerwig, un retrato sincero e cheo de humor das tensións entre unha nai e a súa filla adolescente. O 26 de novembro proxectarase ‘Aftersun’, de Charlotte Wells, unha historia íntima sobre a relación entre un pai novo e a súa filla durante unhas vacacións marcadas pola nostalxia.
Finalmente, o 3 de decembro, ‘Verano 1993’ de Carla Simón pechará o ciclo cun relato autobiográfico sobre a infancia e a adaptación a unha nova familia tras a perda dos pais. O presidente do Cineclube lembrou tamén que a programación continúa a liña temática doutros anos: “Normalmente facemos ciclos temáticos, e nesta volta queriamos achegarnos ás relaxións materno-paterno-filiais. Parécenos interesante ver como o cinema contemporáneo trata esas dinámicas familiares dende distintos contextos culturais”.
A alcaldesa Marián Ferreiro felicitou o Cineclube Serie B “pola súa constancia e polo traballo que vén facendo para ofrecer en Narón un espazo de encontro arredor do cinema de autor”, e animou á veciñanza a participar “nun ciclo que promete emoción, reflexión e moi bo cine”. As proxeccións terán lugar cada mércores ás 20:00 horas, e a entrada será de balde ata completar aforo. O programa completo dos Mércores de Cine pode consultarse nas redes sociais do Cineclube Serie B e na web do Pazo da Cultura de Narón.
