Galicia Ártabra Digital Noticias de Ferrol y la comarca de Ferrolterra.
O Grupo Municipal Socialista de Ferrol manifestou este sábado a súa firme oposición ao incremento do canon que Sogama cobra aos concellos, que pasará de 66 a 108 euros por tonelada a partir de 2025, o que suporá un sobrecusto anual de máis de 1 millón de euros para o concello de Ferrol. Este incremento repercutirá directamente no recibo do lixo que deberán pagar os veciños de Ferrol.
O portavoz socialista criticou que este aumento do canon é resultado dunha mala xestión por parte da Xunta de Galicia e de Sogama, que continúan priorizando a incineración e o vertido de residuos, prácticas obsoletas e penalizadas por unha Directiva europea de 2018. «A Xunta non só non está apostando por un modelo de xestión máis sostible, senón que fai recaer sobre os concellos e os seus cidadáns o custo dunha xestión ineficaz», afirmou o portavoz.
«Ferrol, que xestiona unhas 25.000 toneladas de residuos anuais, verá
incrementado o custo do canon en máis de 1 millón de euros, pasando de pagar 1.650.000 euros a 2.700.000 euros ao ano. Este aumento desmesurado suporá unha nova suba no recibo do lixo que deberán asumir os ferroláns, ademais de outros incrementos, como o do recibo da auga, que xa está previsto que suba un 40%,» destacou Ángel Mato voceiro do Grupo Socialista.
O Grupo Municipal Socialista quixo tamén aclarar que o incremento do canon non está vinculado a un imposto estatal creado polo Goberno de Pedro Sánchez, como algúns pretenden facer ver, senón que deriva dunha Directiva europea de 2018 que busca penalizar ás administracións que priorizan a queima e o soterramento de residuos no
canto de reciclalos e poñelos en valor. Esta directiva foi transposta á lexislación estatal a través da Lei de Residuos de 2022, e xa se aplica na maioría dos países da Unión Europea.
O Grupo Socialista esixe á Xunta que reconsidere esta decisión e utilice os ingresos que obtén do novo imposto para compensar os custos adicionais que deberán asumir os concellos, en lugar de continuar beneficiando a empresas privadas, que ostentan o 49% das accións de Sogama. Ademais, a oposición socialista en Ferrol propón a creación de plantas de tratamento de residuos de proximidade para reducir os custos de transporte e fomentar unha xestión máis sostible.
Moción no Pleno de setembro
O Grupo Municipal Socialista anunciou que presentará unha moción no pleno do mes de setembro para solicitar medidas que eviten que o impacto desta suba recaia sobre os veciños. «Non podemos permitir que se siga castigando aos cidadáns por unha mala xestión pública», concluíron.
Reproche do Partido Popular de Galicia
O PPdeG reprochou a actitude belixerante dos principais partidos da oposición, BNG e PSdeG, coa Sociedade Galega do Medio Ambiente (Sogama) xa que os populares cren que a empresa pública está obrigada a subir o canon que aplica aos concellos debido ao imposto estatal á vertedura e á incineración posto en marcha polo Goberno de Pedro Sánchez.
Desde o PPdeG lamentan que agora socialistas e nacionalistas protesten ante a subida do canon pero mantivesen silencio ante as decisións do Goberno central. “Preguntámonos onde estaban os socialistas galegos cando o Goberno de Sánchez impoñía o imposto á vertedura e á incineración, a súa enésima taxa, que é o único motivo polo que Sogama vese obrigado a actualizar o canon”, denuncian desde o PPdeG.
Os populares ironizan con que “agora o socialismo galego pregoa unidade para atacar á Xunta” pero “cando se lesionaron os intereses de Galicia, o que mostraron foi deslealdade, como sempre, porque a súa única lealdade é a Pedro Sánchez”. Deste xeito, acusan os socialistas galegos de mentir para esconder a cesión de Sánchez a Europa coa creación do devandito imposto a cambio de salvar a recepción de fondos.
Os populares tamén poñen o foco no BNG, ao que acusan de chamar á “rebelión contra a Xunta” mentres se mantén “sempre manso en Madrid”.
“O nacionalismo rende aquí tamén pleitesía a Sánchez, como se viu durante a tramitación da Lei de residuos que incorpora o imposto que fai inviable manter o canon como ata o de agora”, esgrimen desde o PPdeG, que cren que no Bloque “prefiren utilizar un asunto fundamental para os cidadáns como a recollida de residuos como ariete contra Xunta no canto de poñerse a favor do benestar dos galegos”.
Por todo, desde o PPdeG avanzan que nas próximas semanas levarán esta cuestión aos plenos municipais co obxectivo de obrigar “a retratarse a socialistas e nacionalistas”.
r
