Galicia Ártabra Digital Noticias de Ferrol y la comarca de Ferrolterra.
Iván Rivas, portavoz do BNG de Ferrol, anunciou «a presentación dunha moción de urxencia ao pleno do concello de Ferrol que se desenvolverá o próximo luns 29 de xullo con motivo dun novo episodio de recortes do ensino público nesta cidade, en concreto no IES Ferrol Vello».
«O pasado mércores 24 de xullo o consello escolar do centro fixo público a decisión da Xunta de Galiza de recortar dous docentes do actual cadro de persoal do centro». «Esta decisión non ten ningunha xustificación, se ademais temos en conta que o IES Ferrol Vello manterá o mesmo número de unidades que o curso pasado e só se xustifica pola política de recortes no ensino público que o PP leva aplicando ao longo dos últimos anos».
Ivan Rivas, portavoz nacionalista, denunciou que «a Xunta de Galiza está a actuar dun modo inaceptable atrasando cada vez máis a adxudicación das vacantes nos centros educativos e lamenta que aproveite o período estival para actuar sen a mínima das transparencias, de xeito unilateral e deixando aos centros indefensos e sen posibilidade de poder reclamar vacantes en función das súas necesidades».
Por estes motivos, o portavoz municipal do BNG de Ferrol solicitará este luns do resto de grupos municipais «o apoio á demanda da comunidade educativa do centro do mantemento, de cando menos, dos 20 docentes actuais e exixirá do alcalde da cidade un pronunciamento claro e contundente en contra desta política da Xunta de Galiza que atenta contra os intereses da cidade».
O BNG de Ferrol lembra, ademais, que «este centro leva reivindicando a dotación dun equipamento básico para poder desenvolver a súa actividade educativa con normalidade como é un pavillón cuberto que evite ter que desprazar aos alumnos até as instalacións de FIMO para impartir as aulas de Educación Física».
«Un feito que fai aínda máis grave a decisión da Xunta de Galiza que no canto de facilitar os medios necesarios para a práctica docente fai xustamente o contrario e recorta recursos, neste caso docentes, comprometendo a posibilidade de ofrecer ao alumnado unha educación de calidade nos termos que establece a normativa vixente».
Nada xustifica os recortes de recursos humanos no ensino público. Impiden o funcionamento dun centro e repercuten en quen máis necesidades educativas ten.