Medio milleiro de persoas acuden en Narón á Festa gastronómica do Pemento do Couto

A parroquia do Couto, Narón, acolleu este domingo 14 unha nova edición, a vixésimo cuarta, da XXIV Festa gastronómica do Pemento do Couto. Cociñáronse para a ocasión uns 200 quilos de pementos do Couto, que os comensais degustaron con churrasco e cachelos ao mediodía na zona da carballeira localizada nas inmediacións do local social da parroquia.

A alcaldesa da cidade, Marián Ferreiro, e a edil de Festas, Mar Gómez, entre outros representantes da corporación local, acudiron á convocatoria, que reuniu a medio milleiro de  veciños de Narón e tamén doutros concellos na degustación gastronómica.

O programa da xornada deu comezo ás 13:00 horas, coa tradicional lectura do pregón. Un dos integrantes da Orde de Damas e Cabaleiros do Pemento do Couto, Francisco Pico, foi o encargado de presentar o acto, recordando a calidade dos pementos do Couto, recoñecida dende o ano 2010 coa Indicación Xeográfica Protexida coa que se comercializa.

Pico destacou o labor dos produtores “que fan que poidamos desfrutar destes saborosos pementos na tempada de verán” antes de dar paso ao pregoeiro, o xornalista e caricaturista Siro López. Foi o propio Siro o encargado de recordar a historia do pemento en xeral e do do Couto en particular, dende a súa chegada de América ata que Fray Martín Sarmiento os probou no Couto por primeira vez cociñados polo seu amigo Felipe Colmenero.

“A cor verde representa a esperanza, a sensación de equilibrio e seguridade emocional, é relaxante… e os pementos do Couto son verdes, saborosísimos e non pican porque diso se encargou Felipe Colmenero, actuando sobre as plantas e tamén coa maxia dos rezos no mosteiro do Couto”, asegurou.

López recoñeceu, ao remate da súa intervención, que era un orgullo para el ser o pregoeiro desta edición da festa.

A continuación, Francisco Pico agradeceu as palabras do pregoeiro antes de que o presidente da AVV do Couto, Ramón Couto, entregase a López un agasallo en nome da organización.

Finalmente, Pico cedeulle a palabra á edil de Festas, Mar Gómez, que agradeceu a implicación ano tras ano da Orde de Damas e Cabaleiros do Pemento do Couto, da Asociación de Veciños do Couto, da Cooperativa do Val e da Cooperativa Agroflor para poder manter esta festa gastronómica na parroquia, á que desexou moitos máis anos de vida.

Rematado o acto institucional todos os asistentes dirixíronse á zona da carballeira para participar na xornada gastronómica e, a media tarde, dunha sesión de baile amenizada por Jorge Latino.