Reapertura en Narón do local da Asociación de Xubilados e Pensionistas de Santa Icía

A alcaldesa da cidade de Narón, Marián Ferreiro, asistiu este sábado 15 ao acto de reapertura do local municipal que acolle a Asociación Club de Xubilados e Pensionistas de Santa Icía, na Solaina.

A rexedora local estivo acompañada pola edil de Benestar Social, María Lorenzo, e por outros representantes da corporación local naronesa, así como integrantes da citada entidade do barrio de Santa Icía e veciños que quixeron sumarse a esta convocatoria.

A cita deu comezo ás 13:15 horas, coa chegada da directiva da asociación e a recepción aos gaiteiros A Maristela, así como aos socios da entidade, para falar sobre a situación da mesma. A continuación, sobre as 14:00 horas tivo lugar a recepción ao resto de asistentes á reapertura das instalacións, reformadas cun investimento duns 260.000 euros cofinanciados polo Concello e a administración provincial.

Con cargo a esta partida, acometeuse un proxecto que permitiu “dar un cambio total á imaxe deste centro, moito máis diáfano e con espazos e servizos totalmente renovados”, tal e como apuntou a alcaldesa da cidade.

Ferreiro asegurou que tras a tempada de obras “é unha satisfacción poder acompañarvos hoxe na reapertura deste espazo, moito máis acolledor e do que poderedes continuar desfrutando en mellores condicións para actos e actividades que habitualmente se desenvolven aquí ao longo do ano”.

A rexedora local destacou que “hoxe iniciamos unha nova etapa neste centro, cheo de vida e no que espero que continuedes compartindo bos momentos”. Unha vez rematado o acto oficial tivo lugar un xantar popular no propio centro, a base de ensaladilla, salpicón e xarrete e unha sesión musical amenizada nesta ocasión por Alejandro Caribe.