A Biblioteca de Narón e a Axencia de Lectura da Gándara retoman “Trocolibro”

A Biblioteca de Narón e a Axencia de Lectura da Gándara retoman dende este luns 22 a proposta “Trocolibro” unha actividade de intercambio de libros entre as persoas usuarias das citadas instalacións.

A concelleira responsable da área, Olga Ameneiro, desprazouse á Biblioteca municipal con motivo desta iniciativa, na que animou a participar ós veciños.

A edil recordou que os libros se poden intercambiar libremente e destacou “a gran variedade de exemplares dispoñibles, con propostas de lectura infantil, xuvenil ou para persoas adultas”.

Pódese realizar un máximo dun intercambio por persoa e día para levar ou donar, tal e como explicou a concelleira naronesa. Así mesmo, aclarou, non é preciso deixar un libro para poder levar outro, senón que cada persoa poderá levar un libro da mesa habilitada para o “Trocolibro”, independentemente de que deixe ou non outro a cambio.

Na Biblioteca municipal esta iniciativa está operativa no horario de mañá e tarde, de 9:30 a 13:30 e de 16:00 a 21:00 horas de luns a venres e o sábado de 10:00 a 13:00 horas.

Na Axencia de Lectura da Gándara pódese participar dende hoxe ata o vindeiro venres en horario de tarde, de 17:00 a 19:00 horas. A maiores, a edil naronesa informou que con motivo do Día Internacional do Libro, que se conmemora este martes, programáronse visitas guiadas ás instalacións da Biblioteca municipal e da Axencia de Lectura da Gándara.

No primeiro caso terán lugar este xoves 25, en horario de 11:00 a 12:00 para público adulto e de 18:00 a 19:00 horas para público xeral.

As persoas que acudan poderán coñecer as catro plantas da Biblioteca, a do sótano, coa sección infantil, bebeteca, sala de exposicións e actividades; a baixa, coa hemeroteca, sección de información e referencia, de audiovisuais e xuvenil; a primeira, coa sección de adultos e arquivo de depósito de libros e a segunda, coa sección de adultos (materias), seminarios, sala de usos múltiples e de informática.

Así mesmo, na Axencia de Lectura da Gándara haberá unha visita guiada o venres 26 ás 17:30 horas, segundo avanzou Ameneiro.

Os participantes coñecerán as instalacións e os servizos que se prestan no centro e dos que poden facer uso En ambos casos é preciso inscribirse previamente, un trámite que poderán realizar dende o citado luns de xeito presencial ou chamando ao número de teléfono da Biblioteca municipal, o 981 382 173, no horario de apertura

Lea también

Un año mas se celebró la fiesta de Santa Rita en Narón

Un año más se celebró, este miércoles, día 22, en la festividad de Santa Rita, …