Seguindo o rastro do jazz desde Neda ata Cedeira

Para a súa terceira xornada o festival Jazz de Ría prepara un roteiro e tres concertos especialmente pensados para os enclaves escollidos.

A mediodía deste domingo a Ribeira de San Nicolás, en Neda, será o marabilloso pano de fondo para o neosoul en galego da banda Udra premiada na última edición dos premios Martín Códax da Música. Pola tarde en Cedeira, a programación comezará cun roteiro polo Sarridal que sairá do porto da vila para rematar no Castelo da Concepción cos relatos musicados do espectáculo ‘Amares’ no que Rilo & Penadique recrearán historias de mulleres do mar. E pola noite, no parque de San Isidro, Xosé Miguélez & Jean-Michel Pilc Quartet envolverán ao público nunha espiral de procura sonora e invención musical, na que o jazz será experimental ou non será.