O IES de Fene acolleu unha representación de #2pilgrims nos actos do Día das Letras Galegas

Para conmemorar o Día das letras galegas, onte levouse a cabo no IES Fene unha obra de teatro «#2pilgrims» de Redrum teatro dirixida ao alumnado de 3⁰ e 4⁰ da ESO.

Redrum teatro é unha compañía de teatro galego que conscientes dos numerosos poderes que ten o teatro como instrumento social, terapéutico e pedagóxico, traballan con colaboradoras especializadas nos ámbitos da pedagoxía, da educación social e do feminismo para a creación de pezas teatrais cun forte carácter didáctico e reivindicativo.

#2pilgrims vai dirixida a un público adolescente co fin de concienciar, educar en igualdade e inculcar valores que preveñan a violencia de xénero. Con este espectáculo viaxan a través da auto-ficción polo Camiño de Santiago tocando temas como o feminismo, as novas masculinidades ou a importancia actual das redes sociais.

De novo dende o IES e o seu departamento de igualdade queren agradecer á concellaría de Servizos Sociais do Concello de Fene o apoio e colaboración que lles brinda para poder levar a cabo estas actividades tan necesarias na nosa sociedade.