O Concello lembra que a recollida de mobles e residuos voluminosos está suspendida para poder dedicar máis recursos á desinfección

Coa intención de concentrar todos os recursos posibles na desinfección de zonas de risco, o servizo de recollida de residuos e limpeza viaria do Concello mantén suspendida temporalmente a retirada de voluminosos. A concelleira de Servizos, Ana Lamas, adoptou esta decisión entendendo que neste momento da epidemia de COVID-19 “o importante é centrar os esforzos da concellería nas medidas hixiénicas”. Así, durante as últimas semanas véñense potenciando o baldeo de rúas e a aplicación de lixivia á entrada de establecementos de alimentación e outros lugares públicos, en detrimento de outros servizos que, mentres dure o confinamento, o Concello entende que non son prioritarios, coma a recollida de mobles. Por ese motivo, Lamas pídelle á cidadanía comprensión e que, antes de baixar á rúa este tipo de residuos, agarde a que se poida volver poñer en funcionamento a súa retirada, do que o Concello informará puntualmente. Ao mesmo tempo, a edil lembra a obriga de depositar as bolsas do lixo dentro dos colectores destinados a tal fin, aínda máis nun período coma este no que todas as persoas deben extremar as medidas hixiénicas.

A reorganización está facendo posible que as quendas do persoal de limpeza cheguen a todo o territorio municipal. Onte mesmo os traballadores dedicados ao baldeo pasaron durante a mañá polas rúas de Canido, o Ensanche A e o Ensanche B. Os seus compañeiros da tarde percorreron Caranza, Catabois e San Pablo, e os da noite dedicáronse á Magdalena e Esteiro Vello. Pola súa banda, os que teñen encomendada a desinfección fixeron tres percorridos. Un deles comezou en San Felipe e concluíu en Ferrol Vello tras pasar por Brión, Valón, Doniños e o centro urbano. Outro pasou por Vilasanche, Mandiá, Ensanche A e Ensanche B, e o derradeiro, por Papoi, Covas, Esmelle, San Xurxo, Caranza, vivendas da Bazán e Telleiras. O persoal dedicado a estes labores céntrase en hixienizar todas as zonas nas que se rexistre moito paso de xente, como supermercados, panadarías, farmacias, quioscos, estancos, paradas de transporte público, bancos e contedores, entre outros.

Ana Lamas quere expresar o seu agradecemento ás asociacións de veciños e aos cidadáns que están a achegar información sobre lugares nos que detectaron que había necesidade de actuar en canto a limpeza. A edil asegura que as súas contribucións están a axudar moito para seguir mellorando a hixienización da cidade nun momento tan sensible coma esta epidemia.