A sexta edición do Certame Literario “Carmela Loureiro” do Concello estará dedicado á figura de Carvalho Calero

A concelleira Cristina Prados deu conta esta mañá na comisión informativa de Participación Cidadá da celebración da sexta edición do “Certame Literario Carmela Loureiro”, que un ano máis convocan o Concello de Ferrol e a Coordinadora de Equipos de Normalización Lingüística de Ferrolterra (CENL) como homenaxe a unha muller, profesora de Ferrolterra, durante anos presidenta da entidade e que dedicou o seu tempo á lingua e á comunidade educativa.

Tal e como explicou a edil responsable de Normalización Lingüística, o certame está destinado a todo o alumnado dos centros de ensino non universitario do municipio e daqueles centros da comarca que forman parte del CENL. Consta de tres modalidades: na de microrrelatos, os textos deberán ter título, non poderán exceder as 150 palabras e deben comezar pola frase “Petou na porta, dixem “adiante” e entrou…”, recollida no libro “Scórpio”, de Ricardo Carvalho Calero, protagonista do Día das Letras Galegas do próximo ano. En canto á modalidade de micropoesía, o texto non poderá exceder de seis versos. Para ambas dous, establécense catro categorías: A, para alumnos de 5º e 6º de Primaria; B, para 1º e 2º de ESO; C, para 3º e 4º de ESO, e D, destinada a bacharelato e ciclos formativos. Na modalidade de microteatro, o texto no poderá exceder as 600 palabras e deberá ter título. Neste caso, só poderá participar o alumnado de bacharelato e ciclos formativos.

Todos os textos deberán estar escritos en lingua galega, ser orixinais e inéditos e non poderán ter recibido ningún premio ou accésit noutro certame ou concurso. A convocatoria constará de dúas fases, unha interna e outra intercentros. Na primeira, os traballos entregaránselle ao profesorado e será o propio centro quen decida a composición do xurado.

No certame entre os centros participantes, os textos seleccionados deberán entregarse nun sobre pechado e cada centro presentará só dous por cada categoría en cada modalidade. O xurado estará composto por un representante da CENL, outro do Concello de Ferrol, dous alumnos dos centos participantes propostos pola entidade e unha persoa destacada do mundo da literatura. O prazo para entregar os textos en cada centro para a fase interna remata o venres 29 de novembro. Para o concurso intercentros, deberán entregarse no Concello antes do 18 de decembro. O gañador de cada categoría en cada unha das modalidades recibirá unha tablet.

Ensinar a debater

Na comisión de hoxe tamén se deu conta dunha nova edición do “Club de Debate”, dirixido ao alumnado de 3º, 4º da ESO, Bacharelato e ciclos formativos. Trátase dun proxecto para dinamización lingüística entre a mocidade organizado por varios concellos que busca contribuír ao uso oral do galego e ofrecer recursos para a práctica de habilidades comunicativas e de relación interpersoal á vez que promove a reflexión e o intercambio de opinións. A concelleira Prados explicou que o obxectivo é ofrecer “un punto de encontro”, unha oportunidade “para coñecer as opinións dos alumnos sobre asuntos que lle afectan”. A edil sinalou que con esta iniciativa o Concello busca “promover o pensamento crítico e o análises, fomentar a diversidade de opinións, a tolerancia fronte a diferentes cuestións e o traballo en equipo”. Os centros interesados en participar no Club de Debate deben comunicarllo ao Concello de Ferrol antes do 29 de novembro a través do correo gnl@ferrol.es ou no teléfono 981 944 014. Os centros recibirán formación específica para a súa participación tanto na fase local como na fase final. Nos últimos anos participaron os centros IES Leixa, Saturnino Montojo, Canido e CPR Compañía de María.