Cinco alumnos do Centro de Emprego de Ferrol comezan a traballar grazas ao obradoiro Costa Verde

Cinco dos alumnos do obradoiro de emprego Costa Verde, promovido polo Concello de Ferrol e que levou a cabo o Centro de Emprego municipal, veñen de acadar postos de traballo aos que se incorporarán en breve. Así o explicou o director desta acción formativa, Francisco Javier López, no o acto de clausura, ao que asistiron esta mañá o alcalde, Ángel Mato; a concelleira de Emprego, María Teresa Deus; o delegado da Xunta, Ovidio Rodeiro, e o xefe territorial da Consellería de Economía, Industria e Emprego, Isidoro Martínez, e durante o que a todos os participantes no curso se lles fixo entrega dun diploma que os acredita para realizar actividades auxiliares en conservación e mellora de montes.

Tanto o alcalde como a concelleira felicitaron aos alumnos polo labor que desenvolveron mentres se formaban, coa que contribuíron á recuperación e ao correcto mantemento de varias parcelas situadas na zona rural ferrolá, e déronlles os seus parabéns por ter acadado o certificado de profesionalidade. Mato agradeceu á Xunta os aportes económicos para este tipo de iniciativas e insistiu na necesidade de que teñan continuidade no futuro polos bos resultados que están a dar.

O obradoiro de emprego Costa Verde, que contou co financiamento da Consellería de Economía, Industria e Emprego e ao que o Concello aportou unha achega orzamentaria, desenrolouse no Centro de Emprego de Ferrol durante os últimos nove meses. Nel tomaron parte nun principio 20 alumnos-traballadores, aínda que este grupo experimentou varios cambios na súa composición e finalmente foron 19 os que lograron completalo. Neste período de tempo, adquiriron, ademais das habilidades referentes á conservación e mellora de montes, formación complementaria en prevención de riscos laborais, sensibilización ambiental, medio ambiente na agricultura, técnicas de busca de emprego, alfabetización informática e igualdade de xénero.

A parte práctica da formación tivo como obxecto a conservación de parcelas na Torilla, no cuartel de Prior e no Bosque Monumento Torrente Ballester. Posteriormente, solicitouse unha ampliación do proxecto, concedida o pasado 16 de xuño, que permitiu mellorar o antigo estaleiro da Graña, onde se atopa o dique de mareas recentemente rehabilitado. En todas estas zonas, os alumnos dedicáronse a diferentes operacións forestais de roza, poda, apeo e plantación de especies autóctonas, ademais de tratamentos fitosanitarios. Os traballos tamén tiveron como obxectivo a prevención dos incendios forestais.

No transcurso do obradoiro programáronse unha serie de saídas didácticas nas que os alumnos observaron xeitos de traballo de diferentes empresas, nova maquinaria e técnicas agroforestais e de investigación. Visitaron o Centro de Formación e Experimentación Agroforestal de Guísamo, o Centro de Capacitación Forestal de Lourizán, a empresa Hifas da Terra (dedicada á produción e investigación con cogomelos e inxertos), Arboreto e Horta de Conservación de Foiteiras de San Sadurniño, a Feira Forestal Internacional de Tineo (Asturias) e Horticina (de produción de arandos). Precisamente esta última empresa, de Cerdido, é a que seleccionou a cinco dos alumnos-traballadores para comezar a traballar ao remate do curso.

En total, o presuposto co que contou o obradoiro de emprego Costa Verde, que comezou o pasado 30 de outubro, superou os 321.000 euros. A formación teóricopráctica e a práctica laboral/experiencial profesional tiveron unha duración de 445 e 995 horas, respectivamente. O persoal do corpo técnico estivo formado, ademais do director, por dous mestres de especialidade e unha titora docente.