O Bloque Nacionalista Galego de Ferrol quere chamar a atención, unha vez máis, sobre as consecuencias que ten para a cidade manter vixente o convenio co Ministerio de Defensa. Neste caso, tras o escrito enviado ao Concello por parte do citado Ministerio, desentendéndose das súas obrigas de limpeza e conservación do denominado polígono de tiro de Catabois co obxecto de axustarse e cumprir co estabelecido nas novas normativas en materia de prevención e defensa dos incendios forestais. Medidas que o Ministerio de Defensa non ten pensado adoptar indicándolle ao Concello que en virtude do mencionado convenio sexa el que acometa estes traballos.
Para o BNG resulta «ridículo ver ao actual goberno local, que sabe que non pode dar continuidade ao convenio asinado por Rey Varela por ilegal tal e como recolle o interventor no seu informe, manter esta situación de indefinición no tempo«. Sobre todo polas «graves consecuencias de tipo urbanistico e económico que ten para esta cidade non denunciar ese convenio e liberar á cidade dunha vez da obriga de ter que conservar e manter espazos en ruína e cada vez máis deteriorados produto da falla de uso e deixación por parte do Mº de Defensa«.
A situación derivada deste convenio é «tan singular que o Ministerio de Defensa propietario destas instalacións non ten ningunha obriga de limpeza nen mantemento destas propiedades e o Concello que non ten ningunha competencia sobre estes terreos ten adquiridas unhas responsabilidades de conservación que non exerce pero que tampouco quere esixir ao titular dos terreos que é o Ministerio de Defensa, como esixe ao resto de propietarrios da cidade«.
Para o BNG é fundamental «que mudemos a perspectiva e os obxectivos que ten este Concello para co convenio co Ministerio de Defensa. Cumpre, por tanto, que o goberno local abandone a ambigüidade e a indefinición na que se moveu todos estes anos e que so están a provocar a dilación no tempo dunha situación que é insostible para esta cidade e que no canto de enfrentala se quere mirar para outro lado«.
O BNG considera que en lugar de insistir en modificar o convenio, «como fixo o PP, e basándonos no informe de intervención existente debemos anular o mesmo«. Se o goberno realmente quixese anular este convenio «teríao fácil, ten a causa explícita na carencia de informe de fiscalización do convenio aprobado no ano 2015 e o fundamental de que esta nulidade se puidera acometer son as consecuencias que este convenio esta a ter para este Concello e que teñen que ver con que o Concello de Ferrol asuma os tributos que debe pagar outra administración que neste caso é o Estado, que o Concello asuma a conservación mantemento dunhas instalacións que non son da súa propiedade, que sigamos a facer abonos económicos como o que se fixo de maneira irregular no ano 2015 por propiedades en ruinas e que se siga a desenvolver un modelo urbanístico baseado na especulación, que ademais é anacrónico, e que ademais propón desenvolver 460 novas vivendas e un centro comercial nunha cidade que ten o 20% das súas vivendas baleiras«.