AFAL amplía ós luns as terapias en Ares para persoas afectadas de alzheimer

AFAL Ferrolterra vén de sumar un día ó calendario das terapias para persoas afectadas de alzheimer e outras demencias que leva a cabo no municipio de Ares. Así, dende agora, as sesións tamén se celebrarán os luns ademáis dos martes e xoves. O horario, os tres días, é de 11 a 13 horas. A presidenta de AFAL, Ana María López, explica que a medida adoptouse a petición dos usuarios e usuarias que acoden ás terapias e con ela preténdese mellorar a atención que reciben.

Lembrou tamén que as sesións se celebran no Centro de Actividades Culturais e contan coa colaboración do Concello de Ares, a través da Concellería de Servizos Sociais. Así, o prazo para anotarse nos talleres continúa aberto tanto no departamento municipal como nas oficinas de AFAL (rúa Río Castro, 43-45 baixo Ferrol ou teléfono 981 37 06 92).

Os talleres están dirixidos a veciños e veciñas afectados de alzheimer e outras demencias en fase inicial ou moderada e neles lévanse a cabo diferentes terapias para activar, estimular e adestrar as distintas capacidades e funcións cognitivas das persoas enfermas (percepción, atención, razonamento, abstracción, memoria, linguaxe, procesos de orientación e praxias). ¿Obxectivos? Traballar as capacidades residuais da persoa para evitar a frustración do enfermo, aumentar a súa autoestima e contribuír a pór freo ao avance da enfermidade. Esta terapia lévase a cabo mediante exercicios prácticos a nivel individual, e cun enfoque lúdico a nivel global.