Galicia Ártabra Digital Noticias de Ferrol y la comarca de Ferrolterra.
O Concello de Ferrol rememora este sábado a figura de Amada García Rodríguez, unha muller loitadora e na vangarda do feminismo, combativa en dereitos e igualdade, e comprometida coa liberdade e a democracia que foi executada no Castelo de San Felipe o 27 de xaneiro de 1938, hai case 80 anos cando ela tan so contaba con 28 anos.
Natural de Mugardos, Amada foi condenada a morte pola súa militancia comunista cando estaba embarazada do seu segundo fillo. Foi asasinada a tiros xunto con outras 7 persoas aos 88 días de dar a luz a un neno ao que chamou Gabriel.
O Concello de Ferrol lembra este sábado o 80 aniversario da súa morte, un asasinato tan cruento que foi o símbolo da brutal e sanguinaria represión franquista na nosa comarca con centos de veciños executados polas súas ideas. Será cun acto institucional no propio Castelo, no que participarán, ademais da corporación municipal, a neta de Amada, a Asociación Memoria Histórica Democrática e a Asociación de veciños de San Felipe.
LEMBRANZA A GONZALO TORRENTE BALLESTER NO 19 CABODANO DO SEU PASAMENTO E ACTO MUSICADO ABERTO E DE BALDE NO TEATRO JOFRE
O Concello de Ferrol tamén realizará este venres 26 un xesto de recoñecemento para un dos seus fillos mais ilustres, o escritor ferrolá Gonzalo Torrente Ballester (Ferrol, 1910-1999), co gallo do 19 cabodano do seu pasamento que se producía un 27 de xaneiro de 1999 na cidade de Salamanca.
Será cunha ofrenda de flores as 17:30 deste venres no cemiterio de San Salvador de Serantes, parroquia da que Torrente era veciño e onde se atopa aínda a súa casa natal.
O acto consistía nunha ofrenda floral e da lectura de varios textos por parte do profesor José Antonio Ponte Far, estudoso da súa obra, e unha pequena interpretación musical a cargo de membros Banda Municipal.
Doutra banda, as 19:00 horas da tarde, no Teatro Jofre dará comezo un acto especial centrado na relación de Torrente coa súa cidade natal, en particular coa música. É de balde e os convites están a disposición da veciñanza desde o martes 23 na billeteira do Jofre. Pódense retirar dous convites por persoa no horario habitual ate completar o aforo.
O acto comezará coa proxección dun vídeo sobre os lugares de Ferrol que tiveron importancia na vida de Torrente. A continuación, Ponte Far explicará a relación que tivo o escritor coa música e a importancia desta na súa obra literaria. Para rematar, a parte musical: o Coro da Universidade Sénior de Ferrol interpretará una serie de cancións dun tipo de música que era do gusto de Torrente: populares, como cancións galegas, habaneras, tangos, hispanoamericanas, e pezas de música clásica.
CONMEMORACIÓN DO DIA INTERNACIONAL DAS VITIMAS DO HOLOCAUSTO
Por último, na mañá do sábado 27, as 12:30 horas, no Salón de Recepcións do Concello terá lugar un acto de recoñecemento co gallo do Día Internacional das Vítimas do Holocausto.
