O BNG ao goberno local que se comprometa dunha vez coa normalización do galego

» O Bloque Nacionalista Galego de Ferrol considera que o goberno local debería dar explicacións do uso da lingua galega en eventos financiados polo concello, do reparto de diñeiro entre os colectivos da cidade en base a subvencións nominativas e non de concorrencia competitiva e dos termos en que empresas privadas participan en eventos que o Concello financia» sinala o BNG nun comunicado emitido este venres..

«O BNG considera que o Goberno local en relación ao evento das “Meninas de Canido” continua a aplicar unha política de subvencións nominativas semellante à que desenvolvía o Partido Popular e pretende desenvolver para esta actividade un convenio nominativo no que non sabemos cales son os criterios fixados polo goberno municipal de Ferrol á hora de cuantificar a aportación municipal para este evento que este ano se situa nos 10.000 € aos que hai que sumarlle outros 10.000 que aporta a Empresa de Turismo do Concello de Ferrol e cal é o encaixe destas aportacións de diñeiro público nun evento que conta, ademais, coa participación de empresas privadas».

O BNG sinala, ademáis, que a propaganda, a publicidade e os actos que se celebran en torno a esta actividade exclúen o galego, a pesar de estaren financiados con fondos públicos.

O BNG esixe ao goberno local que se comprometa dunha vez coa normalización do galego na nosa cidade. O BNG pide que se lle dea visibilidade e se empregue o galego na publicidade deste evento que habitualmente é case inexistente. As consecuencias deste tipo de comportamentos supoñen un atraso máis no proceso de facer normal o uso da nosa lingua na nosa cidade.

O BNG esixe a este goberno que desenvolvanuns criterios obxectivos para o reparto do diñeiro público entre os colectivos da cidade e abandone a política de subvencións discrecionais do PP para que todas as asociacións da cidade poidan acceder ao diñeiro en igualdade de condicións e con transparencia.

O BNG esíxelle ao goberno municipal que se implique directamente na recuperación e rehabilitación do barrio, con investimentos públicos que o fagan viable e a través dunha xestión directa. Cómpre lembrar que unha iniciativa como esta, que naceu cun caracter reivindicativo e coa esixencia às administracións públicas para que asuman a súa responsabilidade na recuperación do barrio, non se pode substituir pola participación dunha entidade financieira que como toda empresa privada ten como finalidade o negocio.