O TACRC levanta a suspensión que pesaba sobre a contratación de roza de viais e limpeza de cunetas no rural

Hoxe a mañá na Xunta de Goberno Local deuse conta da resolución da Secretaría do TACRC pola que se dispón o levantamento da suspensión da tramitación do devandito expediente relativo ao contrato de roza de viais e limpeza de cunetas da zona rural.

A antedita tramitación veuse suspendida o día 4 de xullo de 2017, 15 días antes de comezar os traballos de roza de viais e cunetas da zona rural. Un prazo de 15 días establecido por lei para que as distintas empresas acheguen recursos ante a resolución, no seu caso. Unha das empresas achegou o último día no que expiraba o prazo un recurso e recurso especial en materia de contratación ante o Tribunal Administrativo Central de Recursos Contractuais (TACRC), alegando que a Mesa de Contratación Permanente do Concello non debería ter solicitado a aclaración da súa oferta económica á empresa Acciona Medio Ambiente SAU.

A consecuencia directa deste feito deu lugar a suspensión cautelar da tramitación do dito expediente e ao adiamento no comezo dos traballos de roza e limpeza de cunetas e viais, co evidente perxuízo para os veciños e veciñas da zona rural.

O Concello de Ferrol como resposta ante esta situación e facer fronte ao servizo levou de xeito urxente á Mesa de Contratación un contrato menor para as rozas máis urxentes e prioritarias ademais de solicitar ao dito tribunal ante o que a empresa denunciante presentou o recurso, solicitar o levantamento da suspensión de tramitación, o que permitiría ao Concello seguir coa tramitación precisa e comezar co traballo de limpeza e roza.

O pasado luns 31 de xullo a secretaría do TACRC finalmente resolveu o levantamento da suspensión da tramitación do experdiente, polo que agora o Concello empraza á empresa ACCIONA MEDIO AMBIENTE SAU a asinar o contrato nun prazo de cinco días, e xa a posteriori comezar os traballos do desbroce. O importe total deste contrato ascende a 161 062,49 € cunha duración de dous anos de execución inicial con opción de prórroga ata un máximo de dous anos.