Retoma a súa actividade a oficina de fomento da Mancomunidade

A oficina de fomento do cooperativismo da Mancomunidade retoma a súa actividade coa colaboración da Consellería de economía, emprego e industria da Xunta de Galicia ao abeiro da convocatoria de subvencións do ano 2017.

O seu labor intégrase na Rede Eusumo, e dará servizo e apoio ás iniciativas de fomento do cooperativismo e da economía social, mediante o impulso do autoemprego e emprendemento cooperativo e o apoio á xeración de novos proxectos nos concellos que integran a Mancomunidade.

A economía social, polos seus principios, perfílase cada día máis como un actor económico e social fundamental na nosa sociedade, e foi unha das alternativas empresarias que mellor resistiu a crise económica.

Actualmente para constituír unha cooperativa precísanse soamente tres persoas, se ben que neste momento estase a debater a posibilidade dunha modificación legal que permita a constitución con só dous cooperativistas.

A nosa comarca destaca pola tradición da fórmula empresarial cooperativa con exemplos en diversos sectores, dende a produción agrícola ata o ensino, pasando por autoescolas e novas tecnoloxías.

A oficina de fomento cooperativo da Mancomunidade terá a súa sede no Centro de Emprego de Ferrol, Teléfono 981944195, Rúa Sagrada Familia 56 Ferrol, e-mail: dregueiro@ferrol.es, https://cooperativismoferrolterra.wordpress.com.

Dende a oficina darase asesoramento individualizado ás persoas que queran constituír unha cooperativa e impartiránse charlas itinerantes para divulgar esta fórmula. Así mesmo estáse a organizar un evento público o próximo mes de setembro para dar a coñecer os mellores exemplos da economía social.