O BNG acusa ao goberno de Ares de manipular os informes da Xunta e mentir á veciñanza

O Grupo Parlamentar do BNG presentou este mércores unha iniciativa no Parlamento Galego para que a Xunta aclare a situación actual na tramitación do PXOM de Ares, que fora aprobado hai agora máis de tres anos. Nesta iniciativa faise un pequeno relatorio do proceso seguido desde o ano 2014 no que o pleno do concello fixera a aprobación inicial, até a pubricación da resolución da D. Xeral de Calidade Ambiental da Xunta o pasado 2 de Maio.

Precisamente, a pubricación deste informe foi a que evidenciou o que o portavoz municipal do BNG, Emilio Mesías, cualificara a pasada semana como “un proceso opaco e fraudulento” acontecido durante estes tres anos. E a evidencia de que isto é así ratifícase coas manifestacións feitas desde o goberno municipal nos últimos días “mentindo novamente sobre o contido do informe e tamén sobre a actuación do goberno municipal” sobre o que Mesías reiteraba que “estamos perante unha emenda á totalidade do traballo (non)feito e, o que é pior, co intento de tomar á cidadanía por parva”.

Afirmacións que o portavoz do BNG concretaba no feito de que “se chegue a trasladar aos medios de comunicación a afirmación de que todos os informes son favorábeis, cando na páxina 6 do informe da D. Xeral só figuran coa cualificación de FAVORÁBEL tres, dun total de 21; e o resto son condicionados e desfavorábeis”. Emilio Mesías entende que esta actitude “evidencia a falta de responsabilidade do goberno municipal e mesmo as súas limitacións no plano ético e moral; porque mentir á cidadanía resulta verdadeiramente indigno”

Na iniciativa tramitada polo BNG no Parlamento Galego faise mención tamén ao feito de que no informe da D. Xeral se afirme que o concello afirma que as alegacións foron resoltas; cando a día de hoxe as persoas afectadas non recibiron contestación logo de tres anos, dando lugar a “unha situación de inseguridade e indefensión das persoas que alegaron, e en xeral do conxunto da veciñanza”, segundo Emilio Mesías; cando hai dados de que “houbo xente que quixo saber da tramitación das súas alegacións –cousa que a actual Lei do Solo regula claramente- e desde o goberno municipal lles foi denegado o acceso á información”.