Galicia Ártabra Digital Noticias de Ferrol y la comarca de Ferrolterra.
A portavoz nacional do BNG, Ana Pontón, reclamou este venres un plan de mobilidade para a comarca de Ferrolterra que inclúa a «modernización do ferrocarril«, servizo sobre o cal alertou da intención do Estado de «desmantelar» as actuais liñas.
No marco dunha visita institucional a San Sadurniño, solicitou a transferencia a Galicia do servizo de proximidade da antiga Feve «con fondos suficientes para a súa modernización».
Achegou o exemplo de Asturias a este respecto, tachando de «inaceptable que o único plan real que ten o Estado é o seu desmantelamento».
A dirixente nacionalista denunciou o «deixamento e abandono importante de infraestruturas» e o «atraso de dezaseis anos» na posta en marcha da Vía de Altas Prestacións para a costa norte galega.
«A pesar das promesas de que a Xunta ía en serio, non se avanzou practicamente nada», dixo aos medios. Pontón demandou que se activen as obras «canto antes» en beneficio de «unha comarca que leva esperando desde o 2000; a paciencia ten un límite, as infraestruturas son fundamentais».
Neste sentido, declarou que o investimento de 12 millóns de euros contemplada no último exercicio orzamentario non se chegou a implementar, senón que se optou por «eliminar esa partida e non investir nada».
A parlamentaria mostrou a súa preocupación polas actuais conexións, fixadas nun modelo «pensado fai corenta ou cincuenta anos» e que non responden as «necesidades da poboación de hoxe nin á realidade social».
Por iso, pide que se «garanta que todo o mundo vai ter acceso a un servizo de autobús en condicións normais» para evitar que «moita xente estea illada nas súas vivendas; non ten posibilidade real de ter un coche particular».
«Esta comarca leva abandonada anos en moitos aspectos», subliñou, para chamar daquela a atención en torno á «deterioración de vías de comunicación; prometeuse unha vía de alta capacidade que non chega e estase desmantelando Feve».
Ao seu xuízo, impídese que haxa unha «mobilidade racional e á altura do século XXI«.
Ana Pontón, que visitou San Sadurniño e Moeche para reunirse cos seus alcaldes, do BNG, tamén dialogou con entidades da zona, reivindicando que se pode «gobernar doutra maneira», unha vía «transparente» e polas «maiorías sociais».
