O BNG de Narón preocupado polo problema do comedor escolar do CPI O Feal

concelleira do grupo municipal do Bloque Nacionalista Galego de Narón, Teresa Sabio, mantivo unha xuntanza cunha representación da Anpa O Buxato do CPI O Feal para abordar a problemática xurdida pola insuficiencia de prazas de comedor para o presente curso 2016/2017 que se traduce en que perto dun cento de alumnas e alumnas do centro non pode acceder a este servizo.

Os representantes da ANPA lembraron que a capacidade asignada polo Servizo de Xestión de Comedores Escolares dos Centros Docentes non Universitarios, dependente da Consellería de Cultura, Educación e Ordenación Universitaria, está fixada desde o curso pasado en 89 prazas para unha comunidade educativa que supera as 620 persoas e para unha demanda de comedor que xa está por riba dos 190 escolares. Así, lembran que a dotación non variou -89- malia que o número de solicitudes para gozar do servizo pasou en só un curso de 130 a máis de 190. Destas, entre 130 e 140 solicitantes precisarían, segundo as estimacións da ANPA, dun uso diario. Porén, a Consellería obviou na asignación de prazas este incremento e por vez primeira desde o ano 2013, cando se aprobou o decreto que regula os comedores escolares, decidiu non aumentar o número de prazas, que viña sendo dunhas dez por ano escolar.

Os portavoces das nais e pais do CPI O Feal lembran que a decisión da Consellería de non ampliar este servizo alegando que se trata dun contrato prorrogado coa empresa que xestiona o comedor escolar ignora que o propio contrato contempla incrementos de até o 25% das prazas se se dan as circunstancias precisas. Nese sentido, lembran ademais que para atender a demanda neste curso non sería preciso realizar ningún investimento material –alén do custe dos menús-, posto que o comedor do centro ten unha capacidade recoñecida para 144 persoas.

A edila do BNG, responsábel tamén da área de Promoción Social e Igualdade do Concello, trasladoulles aos representantes da ANPA o seu apoio e comprometeuse a levar ao Parlamento Galego a súa demanda no momento en que se bote a andar a nova lexislatura. Ademais, lembrou que o propio decreto 132/2013 regulador dos comedores escolares define estes como «un servizo público educativo complementario» que contribúe decisivamente a avanzar no principio de igualdade que debe rexer o sistema educativo. «A conciliación é fundamental», sinalou Sabio, quen engadiu que «semella que a Xunta de Galiza aínda non é consciente de que Narón medra demograficamente cada ano, sobre todo en poboación nova, e que a oferta educativa pública non é suficiente». Sabio sinalou que hai máis de 700 nenos e nenas en idade escolar de Narón que están matriculados en centros dos municipios limítrofes e lembrou que no programa do BNG para as pasadas municipais incluíase a necesidade de solicitar á Xunta de Galiza a construción dun novo centro de ensino primario e secundario no municipio para satisfacer a demanda actual.