Galicia Ártabra Digital Noticias de Ferrol y la comarca de Ferrolterra.
O concelleiro de Cultura, Suso Basterrechea, presentou a programación de actividades da Biblioteca Municipal para o curso 2016-2017 e convidou a todos os veciños e veciñas que non a coñezan a que se acheguen a ela «por tratarse dun espazo do que apenas se fala e que, sen embargo, é excepcional, como un pequeno oasis no medio da cidade».
«É un dos grandes espazos esquecidos», engadiu, cando, sen embargo, recibe unha media de 800 visitas/día, unha cifra máis que salientábel nunha cidade das dimensións de Ferrol.
O edil de Cultura explicou que, co obxecto de enriquecer o valor que xa de por si ten a Biblioteca, xa o ano pasado se programaron unha serie de actividades, con grande acollida, de aí que algunhas delas se repitan este curso.
«Quédansenos curtas as prazas en moitos casos -dixo- polo que animo á xente a que non demore a reserva de praza, sobre todo naquelas actividades que requiren inscrición previa».
Neste sentido, lembrou que hai tres tipos de actividades: as que requiren inscrición, as de entrada libre e ás que se pode asistir por invitación.
No primeiro grupo están o taller de escritura, o club de lectura narrativa, o de lectura positiva e o de teatro para adolescentes. No grupo de entrada libre, pódese asistir ao club de lectura de poesía; ao ciclo de charlas: Aprender a ver cine II; ao ciclo de charlas: Imos contar ciencia; aos encontros para a práctica de idiomas e a visitas guiadas pola Biblioteca baixo petición previa.
Finalmente, as actividades por invitación repiten con A hora do conto, adicada aos máis pequenos, que esta ano contará cos narradores: Cía Trinke-Trinke, Soledad Felloza, Raquel Queizás e Pablismo.
