A piscina da Gándara permanecerá aberta durante o mes de xullo

A piscina municipal da Gándara abrirá as súas portas durante boa parte do mes de xullo para sesións de baño libre. Así o anunciou o concelleiro de Deportes, Román Romero, que subliñou que «hai varios anos que as instalacións permanecían pechadas nos meses de xullo e agosto pero que nesta ocasión abrirán co fin de atender as peticións formuladas por usuarios das instalacións».

Así, as instalacións permanecerán operativas de luns a venres desde o 4 ata o 22 de xullo, ambos incluídos, en horario de 9:15 a 12:15 horas. Os turnos para entrar serán de 45 minutos de duración, correspondéndose os habilitados cos horarios: de 9:15 a 10, de 10 a 10:45, de 10:45 a 11:30 e de 11:30 a 12:15 horas. O acceso á piscina poderá realizarse co bono de baño libre ou tamén retirando a entrada dez minutos antes de cada turno na conserxería do pavillón da Gándara.

O edil naronés destacou «o esforzo realizado este ano desde o Concello para poder manter abertas as instalacións durante este período», e animou así á veciñanza a acudir á piscina nesas datas «para continuar dando uso ás instalacións durante parte do verán, algo que non se viña facendo nos últimos tempos e que consideramos que no caso de que finalmente a aceptación se corresponda coa demanda rexistrada, haberá que analizar a viabilidade de manter en vindeiros anos».

As instalacións pecharán o 22 de xullo e retomaránse no mes de setembro a actividade habitual.