Comeza en Narón o «Curso práctico de elaboración de tapas»

O «Curso práctico de elaboración de tapas» impulsado desde o Concello comeza este martes no Centro municipal de Formación Irmás Froilaz

As instalacións do Centro de Formación Irmás Froilaz, na Gándara, acollen na tarde deste martes, entre as 17.00 e as 19.30 horas, a primeira das xornadas do «Curso práctico de elaboración de tapas” enmarcado no programa Narón Gastronómico. O edil de Promoción Económica, Pablo Villamar, asistirá a primeira hora á presentación do curso que impartirá Xoán Crujeiras, profesor no IES Fraga do Eume de Hostalería e copropietario do restaurante «A Estación», en Cambre, distinguido cunha Estrela Michelín e un Sol Repsol. Un total de trinta e catro hostaleiros da localidade –en representación de vinte e catro establecementos- participan nesta iniciativa impulsada desde a Concellería de Promoción Económica.

Crujeiras transmitirá aos hostaleiros que asisten ao curso a importancia que teñen as tapas no sector, repercutindo directamente na facturación dos establecementos. «É moi importante o produto a utilizar nas tapas e a súa elaboración, pero non podemos esquecer o modo de presentalas», subliñou. Os hostaleiros locais terán a oportunidade de cociñar saborosas brochetas de solombo de porco con arroz, especies marroquíes e salsa de pimentón; bocadillos de carrilleiras estofadas, queixo brie, tomate seco e albahaca ou croquetas de mexillón tigre, entre outra decena de especialidades.

A vindeira sesión do «Curso práctico de elaboración de tapas» desenvolverase o vindeiro martes, 28 de xuño, tamén en horario de 17.00 a 19.30 horas en Irmás Froilaz. Nesta ocasión os participantes, tal e como apuntou Crujeiras, terán a oportunidade de cociñar tapas máis elaboradas e nas que se utilizarán como ingredientes, entre outros, o pemento do Couto e o tomate negro de Santiago.

O edil de Promoción Económica indicou que ao empregar este tipo de produtos na elaboración das tapas «ofrécese a posibilidade de dalos a coñecer e promocionalos entre a clientela dos establecementos, e tamén de amosar diferentes receitas a base destas especies de pemento e tomate cultivados na localidade e comarca».

Villamar agradeceu a presencia de Xoán Crujeiras nesta iniciativa e tamén a de todos os representantes do sector hostaleiro local que se implicaron tanto neste curso como noutras propostas que se impulsan a través do programa «Narón Gastronómico».