Celebrada a entrega de premios do XXVII Certame Intercentros Concello de Narón

O Auditorio municipal acolleu esta mañá, ás 11.30 horas, o acto de entrega de premios do XXVII Certame Intercentros Concello de Narón. Unha representación do alumnado dos centros participantes presenciou a convocatoria, presidida polo alcalde, José Manuel Blanco, e á que ademais da edil de Ensino e Bibliotecas, Mercedes Taibo, acudiron representantes de todos os grupos políticos da corporación local naronesa, encargados de entregar algúns dos premios concedidos neste certame.

Un alumno e unha alumna de segundo curso da Escola de Teatro do Padroado da Cultura de Narón encargáronse de presentar o evento, que comezou coa actuación dos integrantes do Coro Solidario do IES Terra de Trasancos, que interpretou varios temas.

Finalizado o espectáculo musical deu comezo o acto de entrega dos diferentes premios, correspondentes ás modalidades de: Audiovisuais, Expresión oral e canción en galego; Cómic; Narrativa; Poesía; Reportaxe Xornalística e Teatro Escrito e tamén o concurso de Muráis presentados polos diferentes centros participantes.

Alumnos dos CEIP Ponte de Xuvia, Virxe do Mar, A Solaina, Piñeiros, A Gándara, o CRA de Narón, o CPI do Feal e dos IES Terra de Trasancos e das Telleiras subiron a recoller os premios que obtiveron nas diferentes modalidades.

O alcalde, José Manuel Blanco, pechou o acto agradecendo a colaboración do profesorado dos centros públicos de Narón e de todos os rapaces que participaron no certame. Así mesmo, o rexedor local destacou o feito de que o evento alcanzou este ano a súa vixésimo sétima edición, o que constata, subliñou, a consolidación deste certame na localidade.

Blanco valorou tamén o traballo do centro organizador da convocatoria deste ano, o IES das Telleiras, destacou o realizado polos diferentes organizadores en edicións anteriores e animou ao CEIP da Gándara a implicarse na organización da que será a vixésimo oitava edición do certame, que se desenvolverá o vindeiro ano na localidade.