Marián Ferreiro chama á unidade de Terra Galega para seguir «facendo medrar Narón” na Festa do Río en Pedroso

Preto de medio milleiro de persoas participaron na tradicional xornada de confraternidade, na que tamén interveu o coordinador local do partido, Ibán Santalla.

A área recreativa de Pedroso volveuse encher este domingo de centos de militantes e simpatizantes de Terra Galega, reunidos un ano máis para celebrar a súa tradicional Festa do Río.  Baixo unha gran carpa, as persoas asistentes compartiron unha xornada de confraternidade, con xantar popular, música e un chamamento claro á unidade por parte da alcaldesa de Narón, Marián Ferreiro.

O acto arrancou coas palabras do secretario xeral de TEGA, Guillermo Sánchez, quen abriu a rolda de intervencións facendo un balance da lexislatura e poñendo en valor o traballo desenvolvido polo partido neste período.

A continuación o coordinador local de TEGA, Ibán Santalla, reinvindicou o valor de contar cun partido independente en Narón: «TEGA non ten que preguntarlle a ninguén en Madrid que decisión tomar. Só ten unha dirección: Narón. E só ten unha prioridade: os seus veciños e veciñas».

Santalla lembrou que, coas eleccións municipais de 2027 xa no horizonte «o futuro de Narón non o pode decidir ninguén por nós» e chamou á veciñanza a «estar máis unidos ca nunca»

O coordinador local pechou a súa intervención presentando a Marián Ferreiro como candidata do partido aos próximos comicios: «Marián, para moitos de nós es a nosa alcaldesa. Pero por riba de todo, es unha compañeira», afirmou, antes de definila como «a persoa que queremos que siga liderando este proxecto»

Pola súa banda, a alcaldesa agradeceu a asistencia dos presentes e fixo tamén balance dunha lexislatura marcada pola falta de maioría. «Esta é, sen dúbida, a lexislatura máis difícil que lembro. Gobernamos en minoría, cunha oposición unida para dicir que non a todo. E aínda así, seguimos sacando Narón adiante». Ferreiro reivindicou a traxectoria e a xestión do partido: «Traballamos e queremos seguir traballando para que a cidade xere emprego, teña vivenda accesible, coide das súas persoas maiores e das familias, para que siga medrando en poboación e non deixe a ninguén atrás. Ese é o compromiso, e hoxe queremos renovalo convosco”.

A Festa do Río serviu como primeiro gran acto de mobilización de Terra Galega de cara aos comicios que se celebran o próximo ano. Foi neste contexto no que a rexedora local pediu aos asistentes que manteñan e reforcen o seu apoio a TEGA: «Cantos máis sexamos, máis forte é este proxecto.  Ese apoio non é para nós, é para que Narón poida
seguir avanzando sen que o bloqueen”, dixo Ferreiro, que deixou claro que o traballo destes anos ten continuidade: «Levamos corenta anos ao pé de Narón, e iso non se improvisa nin se explica sen vós. Agora tócanos seguir escribindo esa historia».

A alcaldesa rematou agradecendo a fidelidade dos militantes e simpatizantes: «Sodes o motor da cidade, e con vós quero seguir construíndo o futuro de Narón»

Ao remate das intervencións, os asistentes gozaron dun xantar popular e dunha tarde de música na área recreativa de Pedroso.