O BNG de Ferrol manifestou a súa disposición para facer fronte ás esixencias de Urbaser

O Bloque Nacionalista Galego de Ferrol manifestou esta mañá a súa disposición e colaboración para facer fronte as esixencias formuladas por URBASER contra o Concello de Ferrol co fin de adoptar «as medidas necesarias de cara a iniciar o proceso de remunicipalización deste servizo a comezar pola derogación dunha taxa de saneamento, que implica que os veciños e veciñas desta cidade paguen por unha infraestrutura que no resto do Estado pagou o estado».

Os nacionalistas lembraron que tal e como anunciou o goberno local o pasado verán, «a depuradora da cidade, despois de décadas de abandono, non depuraba. O que non impediu que se nos cobrase por este servizo máis de 800.000 euros no remate do ano 2014 e sen que a día de hoxe coñezamos cando se nos vai devolver o recibo cobrado».

Para o BNG consideran necesario «avanzar e ir dando os pasos definitivos para rachar definitivamente o convenio con Augas de Galicia, que implica que o Concello de Ferrol ten que xestionar unha infraestrutura obsoleta e que no momento actual non funciona como é a EDAR. Así mesmo compre rachar coa encomenda de xestión asinada con EMAFESA, que establece que os veciños paguemos unha taxa para pagar as obras incluídas no convenio con ACUAES, a posta en funcionamento da rede e polo servizo de depuración das augas residuais do Concello que segue sen existir».

O BNG instou finalmente ao goberno local que esixa as responsabilidades ao Estado e en concreto ao Ministerio de Fomento e de Medio Ambiente «polo estado deficiente dunha depuradora que construíu a administración estatal, que o Concello de Ferrol rompa o convenio coa Xunta de Galiza polo cal se lle entregou aos veciños desta cidade unha infraestrutura obsoleta», e pediron que «non se faga responsábel destas deficiencias aos veciños e veciñas da cidade».