«VI Bandeira de Traiñeiras» no porto de Ares

O porto de Ares acollerá o sábado, día 17, a partires das seis da tarde, a Sexta Bandeira de Traiñeiras “Concello de Ares”, unha regata organizada polo Club de Remo local que, un ano máis, conta coa colaboración da administración municipal.

Precisamente a esta colaboración referiuse o presidente da entidade, Germán Sánchez, no marco da rolda de prensa celebrada na mañá deste martes, día 13, na alcaldía, na que participaron o edil de Deportes José Juan Vilar, o concelleiro do grupo de goberno e tenente alcalde José Eugenio Fernández, xunto coa concelleira Alma Barrón e o remeiro local Pedro Carro. Sánchez destacou a implicación do Concello con este deporte e, en concreto, con esta regata, xa que sen a súa axuda sería imposible o seu desenvolvemento.

A VI Bandeira de Traiñeiras

A VI Bandeira de Traiñeiras “Concello de Ares” será a antepenúltima regata da división B da Liga Galega de Traiñeiras. No caso da regata de Ares, o presidente do Club de Remo informou de que participarán nove clubes, o que congregará na vila a centos de persoas durante a tarde do sábado.

En canto aos obxectivos ligueiros, Sánchez indicou que a embarcación local tratará de acadar o ascenso de categoría, cousa en que confían dado “o gran nivel dos remeiros”, manifestou o máximo responsable da entidade local.

A traiñeira que resulte gañadora durante o sábado recibirá a bandeira que este martes  luciu na alcaldía durante a rolda de prensa. Ademais, repartiranse 6.000 euros entre as nove traiñeiras participantes, determinándose a contía segundo a clasificación final.

Pola súa banda, o concelleiro de Deportes subliñou o compromiso do goberno local co deporte de Ares e, a este respecto, fixo fincapé nas políticas, non só de infraestruturas e de equipamentos, senón tamén de promoción do deporte de base e de axuda ás entidades locais para o desenvolvemento das diferentes modalidades, como remo- cunha importante implantación neste municipio-, a náutica, o fútbol ou a ximnasia rítmica, entre outros. Ademais, destacou que a organización de iniciativas como esta regata axudan notablemente a dar a coñecer Ares, o que, sen dúbida, favorece ás políticas que tamén se están desenvolvendo no Concello para incementar o turismo.