Galicia Ártabra Digital Noticias de Ferrol y la comarca de Ferrolterra.
As dúas parlamentarias socialistas, Beatriz Sestayo na Cámara galega e Paloma Rodríguez no Congreso, presentarán dun xeito inmediato e urxente , este mesmo mércores, unha batería de iniciativas encamiñadas a esixir das Administracións unha solución que pemita a Megasa continuar coa súa actividade. Na tarde deste martes, día 4,, as dúas deputadas, xunto co responsable de Economía e Industria do PSdeG-PSOE, Bruno Díaz, mantiñan unha reunión de traballo con representantes do comité de empresa da siderúrxica, que emprega a 190 persoas na fábrica de forma directa e arredor de 1.200 dun xeito indirecto.
No caso de Sestayo, ademais de rexistrar iniciativas co obxectivo de ser abordadas á maior brevidade posible en Pleno e en Comisión, solicitou á saída da reunión un encontro do comité de empresa co conselleiro de Industria, Francisco Conde, para poder trasladarlle a necesidade de adoptar unha solución urxente, toda vez que a viabilidade da empresa e a continuidade de todos os postos de traballo da mesma dependen única e exclusivamente dunha decisión política. Hai que lembrar que ésta pasa pola revisión da Orde Ministerial que regula as tarifas eléctricas polas que se rixe esta compañía e os seus competidores.
Pola súa banda, Paloma Rodríguez tamén rexistrará iniciativas nas que tratará de aglutinar nunha mesma proposta parlamentaria a problemática que teñen outras empresas similares emprazadas noutros puntos do Estado, e pedirá con carácter urxente reunións cos máximos responsables do Ministerio de Industria e Enerxía, comezando polo seu propio titular, Jesús Soria.
Os representantes dos traballadores trasladaron ao responsable de Economía e Industria da Executiva Local socialista a súa preocupación polo devastador efecto que o peche da única siderurxia de Galicia tería sobre a comarca, máis aló das graves consecuencias para os propios empregados de Megasa. De feito, máis do 60% da produción da empresa sae por vía portuaria, o que suporía un máis que notable descenso do tráfico portuario local, e moitas empresas auxiliares do naval están a paliar con Megasa a carencia de pedidos en Navantia.
