Galicia Ártabra Noticias de Ferrol y la comarca de Ferrolterra.
A vicerreitora do Campus de Ferrol, Igualdade e Responsabilidade Social, Ana Ares, e o director do Programa Afrontemos da Universidade da Coruña (UDC), Valentín Escudero, recibiron, o pasado venres 18 de setembro, no Campus Industrial de Ferrol, aos representantes dos servizos de atención psicolóxica da Universidade de Santiago de Compostela (USC) e da Universidade de Vigo (UVigo).
O encontro, que tivo lugar na sede da Unidade de Investigación en Intervención e Coidado Familiar (UIIFC), adscrita á Facultade de Enfermaría e Podoloxía, enmárcase nas reunións de traballo programadas para a posta en marca dun protocolo común de acompañamento psicolóxico ao estudantado das tres universidades do Sistema Universitario de Galicia (SUG) , desenvolvido en colaboración co Servizo Galego de Saúde (SERGAS).
Na reunión participaron a responsable do Servizo de Atención Psicolóxica da Universidade de Santiago de Compostela (USC), Ana López, e o responsable do Programa de Acompañamento Psicolóxico ao Estudantado da Universidade de Vigo (UVigo), Ricardo Fandiño.
Ao longo da visita, presentouse o Programa Afrontemos da Universidade da Coruña (UDC), unha iniciativa pioneira no ámbito universitario galego e dirixida á atención psicolóxica da comunidade universitaria e das súas familias.
Desde os seus inicios, en 2021, ata o 15 de setembro de 2026, o programa atendeu a 577 persoas, das que 248 recibiron atención presencial e 329 en liña. O programa ofrece un máximo de seis sesións de terapia por persoa usuaria e a primeira cita obtense nun período inferior a 15 días. Na actualidade, colaboran nesta iniciativa sete psicólogos e psicólogas, con especialización en psicoloxía clínica e sanitaria.
