Galicia Ártabra Digital Noticias de Ferrol y la comarca de Ferrolterra.
Narón acolleu unha nova xornada de plantación de árbores autóctonas promovida pola empresa Cementos Tudela Veguín, pertencente ao Grupo Masaveu, en colaboración co Concello.
A actividade, celebrada a partir das 12.30 horas na senda que conecta Xuvia con Freixeiro á altura de Piñeiros, contou coa participación do alumnado de sexto curso do CPR Santiago Apóstol e o seu profesorado.
A alcaldesa, Marián Ferreiro, e o concelleiro de Medio Ambiente, Manuel Ramos, participaron nesta iniciativa de educación ambiental e mellora dos espazos verdes de Narón xunto a representantes da empresa.
En total, plantáronse dúas decenas de ameneiros, salgueiros e freixos, nunha actividade pensada para concienciar as novas xeracións sobre a importancia da protección da contorna natural.
Ferreiro destacou que este tipo de accións “axudan a crear conciencia entre a xente máis nova sobre a necesidade de coidar o medio ambiente e de conservar os nosos espazos naturais”.
Ramos agradeceu a implicación da empresa promotora e da comunidade educativa, subliñando a importancia da colaboración entre administración, tecido empresarial e centros educativos para impulsar iniciativas ambientais.
Esta plantación dá continuidade ás campañas de sensibilización que a compañía desenvolve no municipio desde hai máis dunha década, en espazos cedidos polo Concello de Narón como a praza Clara Campoamor ou noutros tramos desta senda peatonal e ciclista.
A empresa promotora, Cementos Tudela Veguín, mantén unha longa relación con Narón a través da súa planta industrial no polígono de Río do Pozo, unha das instalacións históricas do grupo en Galicia.
A xornada de sensibilización medioambiental desenvolveuse nun ambiente participativo e educativo, coa plantación como símbolo dun compromiso compartido co coidado do territorio e coa sustentabilidade futura do concello.
