A chuvia obriga a ralentizar as obras da rúa Reis Católicos do barrio da Solaina

 

 

 

O Concello de Narón informa de que as obras de reurbanización da rúa Reis Católicos, no barrio da Solaina, non se atopan paralizadas, senón que se están a ver ralentizadas nas últimas semanas debido ás condicións meteorolóxicas adversas.

 

A elevada presenza de chuvias está a dificultar de maneira significativa o desenvolvemento normal dos traballos, especialmente naquelas fases que implican a utilización de formigón. A execución da pavimentación principal require condicións de secado e estabilidade que non se dan mentres persistan as precipitacións, polo que resulta tecnicamente inviable avanzar con garantías de calidade e seguridade.

 

Así mesmo, desde a dirección da obra explican que tampouco é posible proceder á demolición das zonas que deben ser substituídas mentres continúe o mal tempo, xa que a eliminación das beirarrúas actuais podería provocar a entrada de auga nos portais dos edificios, así como a acumulación de pedras, lama e restos de obra na vía pública, xerando molestias e riscos para a veciñanza.

 

Na actualidade, os operarios continúan a traballar na zona realizando labores de remate, peche e acondicionamento dalgunhas partes da intervención, co obxectivo de manter a obra en condicións adecuadas e preparadas para retomar o ritmo normal tan pronto como as condicións meteorolóxicas o permitan.

O Concello subliña que esta ralentización responde a criterios técnicos e de seguridade, co fin de evitar problemas derivados das filtracións de auga e da acumulación de materiais na vía pública, así como de garantir a durabilidade e calidade final da actuación.

 

Desde a Administración local agradécese a comprensión da veciñanza ante esta situación puntual, allea á planificación inicial, e reitérase o compromiso municipal de continuar os traballos ao maior ritmo posible en canto o tempo dea unha tregua e permita avanzar con normalidade.