X Slálom Concello de Moeche

Esta semana tivo lugar no Concello de Moeche a presentación oficial do X  Slálom  Concello de Moeche cuarta proba puntuable para o Campionato Galego de Slálom 2025. 

O evento, que se celebra este sábado 19 de xullo, chega á súa décima edición con algunhas  novidades, entre as que destaca unha pequena modificación no trazado. Esta variación manterá a esencia  do percorrido tradicional, conservando tamén a espectacular grada natural situada ao carón do  concello, desde a que o público poderá seguir o paso dos vehículos con total seguridade. Por outra  banda, salientar que o número de participantes será numeroso, pois ascende a un total de 72 vehículos  inscritos. 

As mangas de adestramentos desenvolveranse durante a mañá, mentres que as mangas oficiais  celebraranse pola tarde e serán as encargadas de decidir as e os gañadores nas diferentes categorías. 

Nesta edición, ademáis da clasificación xeral e das diferentes agrupacións, entregaranse trofeos especiais para: 1º, 2º e 3º Feminino; 1º, 2º e 3º Históricos; 1º, 2º e 3º Veteranos; 1º, 2º e 3º Escudería Moeche; 1º, 2º e 3º BMW; 1º, 2º e 3º Copa Debutantes.

Na presentación oficial estiveron presentes Beatriz Bascoy Maceiras, alcaldesa de Moeche; Moisés  García Fernández, presidente da Escudería Moeche; así como David Saavedra, Juan José Sueiras,  Modesto López e Sergio Fernández, membros da directiva da Escudería Moeche. 

A organización anima todos os afeccionados ao motor a achegarse a Moeche este sábado 19 para gozar dunha intensa e emocionante xornada de competición automobilística.